Leimin vanga tangkhang an tam; Khawtlangin ei tur leh riahna an pe

Tun hnaia ruahsur nasa vangin Mizoram hmun hrang hrangah leiminin kawngpui a hnawh a, khualzin eng emaw zat an táng. Khualzin tangkhangte hi an tànna bul hnai khuate'n an buaipui a, ei tur leh riahna tur an buatsaihsak.

Aizawl-Thenzawl-Lunglei (ATL) Road-a Sialsuk leh Thenzawl inkara Sentezèl quarry chu a chim a, la chim belh zel theia ngaih a ni bawk. Sentezèl quarry chim avang hian May 31, Inrinni khan khualzin eng emaw zat an tâng.

Sentezel quarry chim vanga tángte hi Sialsûk khawtlang chuan buaipuiin, an ei leh in tur leh riahna tur an buatsaihsak a; hotel-ah mi eng emaw zan an riahtir bakah, mimal inah an sem darh a, mi 300 chuang an mikhual nia thu dawn a ni. Lirtheia riakte nen phei chuan mi 500 vel an nia sawi a nih bakah, niminah chuan mi 600 vel an awm niin an sawi.

Mikhualte hian an thlenna inah chaw an ei ve nghal a, Sialsuk VC leh YMA-te chuan chawhmeh ṭhahnem tak an lei khawm a, mikhual thlengtu chhungkuate hnenah an sem a ni. Keiṭum YMA-te leh khaw dang ṭhenkhatah pawh khawtlangin leimin vanga tángte an buaipui bawk.

Siaha-Aizawl Maxicab Drivers Welfare chuan, Sialsuk leh Keiṭum khawtlangin Siaha leh Aizawla inkara tlân maxicab tangkhangte leh an passenger-te an buaipui avanga an lawm thu an tarlang a ni.