Harsatna tâwk ṭanpuitute chungah Central YMA-in lawmthu a sawi

Central YMA chuan thuchhuah siamin, ruahtui nasa tak tla vanga harsatna tawkte ṭanpuitute zawng zawng chungah an lawm thu an tarlang.

Mizorama ruahsur nasa vanga harsatna thleng buaipuitu leh kawng chhiaa khualzin tangkhangte harsatna su kiang tura hma la mektu YMA-te chungah an lawm thu tarlangin CYMA chuan, "Khawpui chhung leh kar kawng Aizawl-Lunglei, Aizawl-Champhai kawng hmun hran hrana leimin vanga khualzin tangkhangte buaipuiin YMA, Serchhip Sub-Hqrs leh Saitual Sub-Hqrs leh an hnuai branch te, Sialsuk branch-te an che mek tih hriat a ni," an ti.

CYMA chuan khawpui chhung hmun ṭhenkhatah pawh YMA branch-te'n leimin leh in chim vanga harsatna tawkte tan hma an tih sawiin, "April 2025 fimkhur thla atana hman a nih hnua hetiang harsatna lo thleng hian fimkhurna thla hman a ṭulzia a lang. YMA sub-hqrs, group leh branch tin theihtawp chhuahtute chungah lawmthu kan sawi a ni," an ti a; CYMA hnuaia disaster response team pawh a ṭul huna che chhuak thei mai turin an inring reng tih an sawi bawk.