Hmun tam takah kawlphetha a chhia; PE dept-in mipui hriatthiamna an ngen

Power & Electricity department chuan ngenna leh hriattirna tichhuakin, tunlaia ruahsur leh thli tleh vanga Mizoram hmun hrang hranga kawlphethaa harsatna awm chu theihtawp chhuaha an buaipui thu an tarlang a; dawhthei taka hrethiam tur leh ṭawiawm zel turin mipui an ngen.

PE department chuan, ruahpui leh thlipui karah thawktute'n theihtawp chhuahin chhun zan zawmin kawlphetha chhe lai siamṭhat hna an thawk tih an tarlang a, "Thli leh ruah a thawh reng avangin siamṭhat hna thawh a sâwt thei lo a, power network chhia a awm belh zel bawk. Hmun tam takah power lak luhna (hruipui) leh sem chhuahna (hruitê) a chhia a, electric ban tam tak a tluk bakah, transformer lian (power transformer) leh transformer tê (distribution transformer) a chhe nual," an ti a; hmun ṭhenkhatah leiminin khawl a hnawlte pawh a awm tih an tarlang.

Power supply a khaihlak chu pawi an tih thu tarlangin PE department chuan, "Mipui hriatthiamna kan ngen. Siamṭhat hna theihtawpin kan thawk chhunzawm reng a, dawhthei taka lo hrethiam tur leh theihtawpa min ṭawiawm turin mipui kan ngen a ni," an ti.