Chhiatna thlengin ka rilru a luah reng - Chief Minister

Chief minister Lalduhoma chuan May 31, Inrinni khan a social media account-ah Mizoram hmun hrang hranga chhiatna thleng chanchinin a rilru a luah reng tih a tarlang a, "Nizan phei kha chu ka mu meuh lo a ni," a ti.

Lawngtlai khawpuia in panga leh in rel lai pahnih chima chhanchhuah hna thawkte chanchin a ngaihven reng tih tarlangin Lalduhoma chuan, "Hna thawktu zawng zawng chungah lawmthu ka sawi a, in inpekna leh huaisenna ka chhuang hle mai. Hmun hrang hrangah chenna in chán te, hmun him lama insuan chhuah ngaite an awm. Mi tlawmngai tam takte'n ṭanpui ngaite in ṭanpui mek tih ka hria. In zaa chungah lawmthu ka sawi a ni," a ti a; Pathianin awmpui zel se a duh thu a tarlang.

Chief Minister chuan, a bial Serchhip lamah pawh chhiatna a thleng nual a, an in a chim avangin Ramzolura, P&E Veng a thi tih a tarlang a, "A pawi ka ti tak zet a ni. Chhiatna tuar zawng zawngte tan ka ṭawngṭai. Sorkar chuan chhanchhuahna leh chhawmdawlna lamah a tih theih apiang a ti zel dawn a ni," a ti.