World No Tobacco Day hman a ni; Lunglei TCC pantu 111-in an sim hlen

May 31, Inrinni kha World No Tobacco Day a ni a, Mizoramah pawh hman a ni. Lungleiah chuan Nursing School-ah hman niin, Lunglei SP J Lalmuankima'n a hmanpui. Kum 2024 chhung khan Lunglei Civil Hospital-a Tobacco Cessation Clinic pantu mi 533 zinga mi 111-in vaihlo zûk leh hmuam an nghei hlen tih tarlan a ni.

World No Tobacco Day hmannaa tarlan danin, Lunglei Civil Hospital-a vaihlo zûk leh hmuam nghei duhte enkawlna hmun, Tobacco Cessation Clinic-ah kum 2024 chhung khan mi 533 an inentir a; chu'ng zinga mi 111 chuann an nghei hlen.

Kum 2024 chhungin District Tobacco Control Cell, Lungleiin vaihlo chungchangah awareness campaign ṭum 37 leh training ṭum li an buatsaih a; dan kalha vaihlo zuar an awm leh awm loh ṭum 78 an an endik.

Tobacco Cessation Clinic-a inentir zingah National TB Elimination Programme lama inentir turin mi pasarih tirh an ni a; TB enkawltute aṭangin mi 30 leh OPD-a inentir zinga mi 146 chu Tobacco Cessation Cell-ah tirh an nih. Vaihlo nghei tumte hnenah vaihlo châkna chhâwkna turin kum 2024 khan Nicogum strip 702 pek chhuah a ni bawk.

Lunglei SP J Lalmuankima chuan, zûk leh hmuam thil chi hrang hrangte chu a siam chhuaktute'n îtawm tak leh hman châkawm tak takin a báwm leh a káwrte siam mah se, taksa tan a ṭha lo tih hre renga hnar zel turin kalkhawmte a sáwm a, "Zirna-in bul hnaiah vaihlo leh a kaihhnawih thil zawrh khap a ni a, sorkar laipui aṭangin hei hi khawng zawka kalpui tura thu kan dawn angin hma kan la zel a ni," a ti.

Kumina World No Tobacco Day thupui chu 'Unmasking the appeal: Exposing industry tactics on tobacco and nicotine products' tih a ni a; Lungleia hmanna hi Lunglei District Tobacco Control Cell district nodal officer Dr Zoramthangi Renthlei-in a kaihruai a ni.