January - March 2025 chhunga Lunglei district-a bank-te CD ratio 72.02% a ni

Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu additional DC Zoramdini hoin May 30, 2025 khan DC conference hall-ah an ṭhukhawm a; January- March, 2025 chhunga Lunglei district-a bank-te credit deposit (CD) ratio chu 72.02% a nih thu tarlan a ni.

Ṭhutkhawma tarlan danin, Lunglei district-a bank hrang hrangte January-March 2025 chhunga CD ratio chawhrual chu 72.02% a ni a; October-December 2024 chhunga CD ratio (71.69%) chu 0.33%-in an khûm.

Meeting-ah hian January-March 2025 (4th Quarter, 2024-25) chhunga Lunglei district-a bank-te hnathawh thlir let a nih bakah, hmasawnna turte sawiho a ni a; kum 2025-2026 chhunga Lunglei district-a bank-te'n loan an pek chhuah dan tur ruahmanna Annual Credit Plan (ACP) tlangzarh a ni.

Bank sum vawn himna (security) lam leh pawisa lêng vel (currency management & remittance) chungchang sawiho a ni a; bank zawng zawnga awm ngei ngei tur security guard, CCTV, fire extinguisher leh security alarm te ngaih pawimawh ni se, an ti.

Ṭhutkhawma tarlan danin, Lunglei district-ah Pradhan Mantri Jeevan Jyoti Bima Yojana (PMJJBY)-a inziak lut thei mi 64,196-ah mi 13,501 (21.03%) an inziak lut a; Pradhan Mantri Suraksha Bima Yojana (PMSBY)-a inziak lut thei mi 1,06,542-ah mi 30,832 (28.94%) inziak lut. Atal Pension Yojana (APY)-a inziak lut mi 1,931 an awm.

Lunglei district-a bank-te'n loan an pek chhuah dan tur Annual Credit Plan ruahman aṭangin bank-te'n priority sector hnuaiah 86.56% leh non-priority sector hnuaiah 137.52% loan an pe chhuak tawh a; Kisan Credit Card hnuaiah crop loan cheng nuai 2,960.96, animal husbandary loan cheng nuai 1,968.94 leh fishery loan cheng nuai 4.50 pek chhuah niin, mi 204 hnenah PMEGP loan cheng nuai 697.66 pek a ni.

PMEGP bikah hian kum 2024-25 target cheng nuai 197.28 chu khûmin, 353.64% pek chhuah a ni a a; bank hrang hrangte'n financial literacy campaign vawi 28 an nei bawk.