Rinpuii'n thawh hreh nei lo turin zirlaite fuih

Minister Lalrinpuii chuan May 30, 2025 khan J Buana College Multipurpose Hall-ah Valedictory Day a hmanpui a; zirlaite chu chhawr tlak thiamna paw chhuak ngei tura inzir tur leh hna thawh zah leh thawh hreh nei lo turin a fuih.

Lalrinpuii chuan, tun hnaiah Mizoram chu ziak leh chhiar thiam vekna state (fully literate state)-ah puan a nih thu sawiin, "Hei hian Mizote hi mi inzir mi, zirna lamah chuan hnam dang ai maha sang kan ni tih a tilang. Zirlaite hian zir kual dûma thiam nial nual ni loin, chhawr tlak thiamna paw chhuak ngei tura inzirin, eng hna pawh thawh zah leh thawh hreh nei lo turin inbuatsaih ang che u," a ti a; JB College aṭanga zir chhuak tharte chu taima taka bei zel turin a chah.

Health Minister chuan, mirethei leh harsa zawkte hmakhua ngaiin sorkarin hmalakna tam tak a nei tih sawiin, "Ruang phurh sorkarin a kutken tawh a, dam loh nikhuaa pûk chawp leh a bá thlaua damdawi-in aṭanga inkhul chhuak ṭhinte tan pawisa chawi ngai miah loa an inenkawl theih dan tur mipui healthcare sorkarin a duang chhuak a, a hlâwkpui ber tur chu mipui kan ni," a ti.

Ruihhlo leh HIV/AIDS-in Mizoram a rûn mek tih sawiin Lalrinpuii chuan, theihtawp chhuaha ruihhlo do tur leh mipat hmeichhiatna hman khawlohnaa inthiar fihlim turin a ngen.

JB College Valedictory Day hi Lunglei Municipal Council (LMC) vice chairman K Lalrinawma leh Mizoram University-a College Development Council director Prof. Lalbiakdiki Hnamte te pawhin an hmanpui a; Vanlalpekhlua leh K Vanlalruata hnenah 'Best Library User Award' hlan a ni.

J Buana College hi August 26, 1983-ah din a ni a, kumina zir chhuak tur (final semester) zirlai 114 an awm. Arts department pakua a awm a, zirlai 375 leh zirtirtu 33 an awm mek a ni.