KHAWTHLIR

Thisen pe

May 31, Inrinni khan KṬP, Durtlang Pastor Bial chuan nimin khan Synod Hospital tan thisen unit 73 an pe a, petute mipa 64 leh hmeichhia pakua an ni. ṬKP, Lunglawn Bial pawhin Lunglei Civil Hospital tan thisen unit 46 an pe a, petute mipa 34 leh hmeichhia 12 an ni.

No Tobacco Day

Ministry of Information & Broadcasting hnuaia Central Bureau of Communication field office, Aizawl chuan May 31, Inrinni khan IDEAS Training Centre, Chawlhhmunah World No Tobacco Day pualin hun an hmang. IDEAS Training Center managing director Daniel Hauhnar khuallian a ni a; H Remruatpuii'n vaihlo chi hrang hrang kaihhnawih natna awm theite leh a ṭhat lohnate a sawifiah.

Minister-in ṭhutchilh

Tunlai ruahsur nasa kaihhnawiha Mizoram hmun hrang hranga District Emergency Operation Centre (DEOC)-te hmalakna leh hnathawhte vil a, report thehluhte aṭanga hma la turin State Emergency Operation Centre (SEOC) chuan May 31, Inrinni zing dar 9 aṭang khan DEOC-te an vil ṭan. Disaster Management & Rehabilitation minister Prof. Lalnilawma pawhin Inrinni khan nilengin SEOC a ṭhutchilh a ni.

Hlawhtling lawmpui

Khawzawl Darngawn Village Council chuan May 31, Inrinni khan an veng YMA Hall-ah MCS, MBBS, HSLC leh HSSLC exam-a hlawhtlingte lawmpuina hun an hmang a; Khawzawl SP F Lalbiakzauva'n a hmanpui.

Ruihhlo inzirtir

Foundation For Drug-Free Mizoram chuan nimin khan Tuikual North Presbyterian Kohhrana Youth for Christ-ah ruihhlo ṭhat lohzia inzirtirna an buatsaih a; resource person Moses Lalremruata'n ruihhlo ṭhat lohna a zirtir. Ruihhlo laka fihlim turin tleirawl 116 an intiam bawk.