Mizo hmun hluite chawi sâng turin ruahmanna ṭha siam a pawimawh - Tourism Minister

Tourism minister Lalnghinglova Hmar chuan, hmânlai Mizo pi leh pute khawsak ṭhinna hmun hluite chu hnam ro hlu a nih thu sawiin, "Hnam dangte hmuh theih tura chawi sâng turin tunlai khawvel mila ruahmanna ṭha siam a pawimawh," a ti.

Lalnghinglova Hmar kaihhruai hian nimin khan Chief Secretary Conference Hall-ah sorkar hotute'n Mizoram Heritage & Tourism Development Committee din chungchang leh Mizorama hmânlai pi pute sûlhnu la awmte ṭha zawka chhinchhiah leh zin mite hîpna atana pho chhuah dan tur an sawiho a ni.

Tourism Minister chuan, "Kut themthiamna hmanga lemziak mite kutchhuak (art) leh hmânlai pi pute khawsak ṭhinna hmun hluite hi kan hnam ro hlu a ni a, chawisan leh vawn him a ngai. Khualzin hîp theihna hmanraw ṭangkai a nih avangin hnam dangte hmuh theih tura chawi sâng turin tunlai khawvel mila ruahmanna ṭha siam a pawimawh," a ti a; Mizo hmunhma neih ṭhatte zir chiang a, khawvel huapa pho chhuak turin Mizoram Heritage & Tourism Development Committee din a ṭul thu a sawi.

Ṭhutkhawmah hian Tourism department, Art & Culture department, IPR department, Land Revenue & Settlement department leh Planning & Programme Implementation department hotute an tel a; video conferenceing kaltlangin Association Internationale des Arts Plastiques/International Association of Art, India Chapter president Manaj Saha a tel bawk.