CLP-in Covid-19 dona atan sum Ngaihtuah turin Larsap an ngen

Congress Legislature Party (CLP) chuan, nimin khan an leader Zodintluanga hmingin Governor PS Sreedharan Pillai hnenah Covid-19 vanga Mizo state páwna tangkhangte ngaihsak an nih theihna atan hma la tur leh, a theih anga Covid-19 dona tur sum ngaihtuah tura ngenna an thehlut. Lehkha hi Governor aiawhin a secretary K Lalthawmmawia'n a dawng.

CLP chuan, Governor hnena lehkha an thehluhah hian state páwna Mizo tangkhangte chhawm­dawlna chungchangah Mizo­ram sorkar duhkhawp lohna eng emaw zat an neih thu an tarlang a, "Chief Minister hnenah rawtna kan thlente'n ngaih pawimawh a hlawh loh avangin i hnenah rawtna kan thlen leh a, tihhlawhtlin a nih theih nana hma minlak sak turin kan ngen che a ni," an ti.

MPCC president Lal Than­hawla'n April 8 khan CM hnenah lehkha ziakin, Mizo tangkhangte chhawmdawlna pe tura a ngen thu tarlangin CLP chuan, "Data lâk khawm a, an awmna state sorkara ṭanpui tura ngenna lehkha siam bak hma­lakna a la awm lo," an ti a; tangkhang zingah pawisa leh ei tur mumal nei tawh lo an awm avangin chhawmdawlna pek a hmanhmawhthlak thu an tarlang.

Congress party MLA-te tar­lan danin, India hmarchhak state dangte chuan an state mi hmun danga tangkhangte chu ṭanpuina an pe mek. Manipur-in mi 3,771 hnenah Rs. 2,000 ṭheuh leh Sikkim-in zirlai tangkhangte hnenah Rs. 5,000 ṭheuh an pe tawh a; Meghalaya sorkarin Rs. 3,000 ṭheuh leh Arunachal Pradesh-in Rs. 3,500 ṭheuh pek an nih tur thu an puang tawh.

Mizo tangkhangte chu Mizo­ram sorkarin chhawm­dawlna a pek mai loh avangin har­satna an tâwk nasa tih tarlangin CLP chuan, "An awmna state-in ṭanpuina a lo pek leh Mizo welfare-te'n an tuamhlâwm ringawt pawh eng emaw zat an awm tawh. Heng mite hian sorkar laipui aṭang leh Mizoram sorkar aṭanga ṭanpuina an hmuh thuai theihna atan hma laksak turin kan ngen a che," an ti.

CLP chuan, Mizoram sorkar­in Covid-19 dona atan sum a nei thlâwt loa a lan thu tarlangin, "CM, minister leh MLA-te'n anmahni sum séngin an bial chhunga ṭanpui ngaite nasa takin an ṭanpui tawh a, heng bakah hian kohhran leh mi tlawmngaite'n chhungkaw sang tam tak an ṭanpui tawh a ni," an ti a; FCSCA Minister phei chuan buhfai hlànthlakna atan a mimal sum Rs. 1,53,398 a sèn tawh thu an sawi.

Covid-19 donaa a hmatáwnga awm local task force (LTF)-te'n sorkar sum tel loin, mi ṭha­hnemngaite thawh khawm hmangin chhawm­dawlna an kalpui tih tarlangin Cong­ress MLA-te chuan, "LTF ṭhen-khat chuan CM Relief Fund-ah pawisa an thawh zawk hial a ni," an ti.

CLP chuan, sorkar lai­puiin chhawmdawlna a siam, Construction Wor­kers Welfare Board sum aṭanga Mizoram sorkarin sum a sem bak state sorkar sum aṭangin chhawmdawlna a kalpui miah loa a lan thu tarlangin, "Hei hian state sorkarin Covid-19 dona tur sum a nei lo tih a tichiang hleah kan ngai," an ti a; sorkar laipui aṭanga sum awm ang ang Mizoram tan dap turin an ngen.

Kum 2020-21 Mizoram budget chu cheng vbc. 10,715 a nih thu tarlangin CLP chuan, "Kan budget aṭang hian inkhàrkhip vang­a harsatna tâwk mipui leh task force-te ṭanpuina tur sum, cheng vaibelchhe eng emaw zat a awm thei ngei turah kan ngai. Mipui chhawmdawlna tur pawisa hi Mizoram budget aṭang ngeia theh chhuah a nih theih nana hma min laksak turin kan ngen che a ni," an ti.

•Chief Minister hnena rawtna kan thlente'n ngaih pawimawh a hlawh lo.

•Tangkhang zinga pawisa leh ei tur nei mumal tawh lo an awm avangin chhawmdawlna pek a hmanhmawhthlak.

•India hmarchhak state dangte'n an state mi tangkhangte ṭanpuina an pe mek.

•Covid-19 dona atan Mizoram sorkarin sum a nei thlâwt lo niin a lang.

•Mizoram sorkarin Covid-19 dona atan state sorkar sum a hmang lo.

•Kan budget aṭangin cheng vaibelchhe eng emaw zat a awm thei turah kan ngai.