KHAWTHLIR

Nimin khan Aizawl Civil Hospital Blood Bank-ah Pachhunga University College NSS unit-te'n thisen unit 36 an pe a, a petute mipa 33 leh hmeichhia pathum an ni a, Republic Higher Se­condary School NSS-in unit 13 pein, petute mipa 12 leh hmeichhia pakhat an ni. Individual voluntary donor 19 an awm bawk. Kolasib Venglai Branch pawhin tun kar chhung thisen pek tumin nimin aṭang khan Kolasib District Hospital-ah an pe ṭan a, a ni hmasa berah hian mipa 11 leh hmeichhia pakhatin unit 12 an pe a ni.

Mizorama pawl leh mimal 12-te chuan Covid-19 léng do nan nimin khan Chief Minister's Relief Fund-ah sum an thawh a, nimin tlai dar 3 thlenga pawl/mimal 12-te sum thawh khawm chu Rs. 6,59,173 a ni.

Mizoram páwn aṭanga mipui ni tin mamawh leh bungraw pawimawh luh ṭanna Vairengte leh Bairabia lirthei lutte phuh thianghlim (disinfection) hna thawk turin Fire & Emergency Services chuan April 19, Pathianni khan kâng ṭhelh motor (fire tender) pahnih an tîr chhuak a, Kolasib DC hnena an inhriattir hnuah DC kaihhruainain an tih tur an thawk nghal. 

Ministry of Civil Aviation (MCA) chuan ram puma inkhârkhip puan a nih hnua domestic leh international flight tihtawp a nih avangin March 25 leh May 3 inkar atana ticket book tawhte chu an sût duh a nih chuan cancellation charge awm loin an ticket book-na man pe kîr vek turin airline-te a hriattir. Pawisa chu booking an cancel aṭanga chawlhkar thum chhunga pe tura tih an ni bawk.

YMA, Tripura Group leh Taitesena Group chuan thuchhuah siamin, Covid-19 donaa police duty pahnih - Zairemmawia leh C Lalhruaitluanga kut thlaktute hrem ngei an phût thu an tarlang a, "Pawi khawihtute hi man chhuah an nih a, an phu tâwka hrem ngei kan phût tlat a ni. Pawi khawihtute zawn chhuah kawngah thuneitute pui turin kan inhuam reng e," an ti.