MNYF-in Revenue office an dang An thil phut sorkarin a tihlawhtling

MNF-in Mizoram sorkarin stamp duty leh fee dangte a tihpun tihniam an phut avangin MNF ṭhalaite chuan nimin khan Land Revenue & Settlement (LRS) Directorate-a pisa kai turte an dang a; sorkarin an thil phut a tihhlawhtlin hnuah an ṭindarh.

MNF ṭhalaite hi LRS Directorate-ah hian zing dar 9 velah an thleng a, thawkte chu devotion an neih zawhah pisa chhuahsan turin an ngen a, dar 10 velah thawktute chuan pisa an chhuahsan. An hriat loh laiin LRS Director chu a pisaah a lut a, mahse, a hnuah MNYF ngen angin pisa a chhuahsan ve leh a ni.

MNYF chuan, LRS Directorate chhungah tumah luh an phal lo chungin Aizawl DC Kannan Gopinathan chu pisaah a lut a; MNYF-te chuan chhuak turin an ti a, darkar chanve vel police nen an innawr buai hnuah DC chuan pisa a chhuahsan.

LRS Minister R Romawia hoin MNF ṭhalaite thil phut hi nimin vek khan ngaihtuah nghal a ni a, tlai dar 3 velah meeting thuchhuak LRS Director-in a puan hnuah MNF ṭhalaite chu an ṭin darh a ni.

LRS Minister hoa thutlukna siam a nih dan chuan The Indian Stamp (Mizoram Amendment) Act, 2016 hmanga July 1, 2016 aṭanga chhiah lak tura tih chu sut a ni. Stamp duty chu kum 2007 rate anga lak leh tur a ni a, a man sanga lak tawhte chu ngaihtuah nawn leh tura tih a ni.

MNYF chuan thuchhuah siamin, revenue stamp fee chu sang uchuak takin sorkarin a tisang nia sawiin, "Rs. 100 kan chawina ṭhinah Rs. 2,000 chawi a ngai tawh a, Rs. 500 kan chawina ṭhinah Rs. 20,000 - 1,00,000 lai chawi a ṭul ta hi pawi kan ti," an ti.

Tihhniam a nih theih nan MNF Vigilance leh Publicity department-te'n a hrang ve vein press conference an nei tawh a, Chief Minister hnenah ziaka an thlen tawh bakah, MNYF hruaitute'n LRS Director an ngen tawh bawk tih an sawi.

Stamp duty leh fee dangte tihniam loa a rate thar anga an lak zel avangin MNYF-te chuan sorkarin thu thar a neih hma chuan LRS directorate-ah pisa kai lo turin staff leh mipui an ngen tih an puang a ni.

MNYF chuan, The Indian Stamp ( Mizoram Amendment) Act 2016 chu mipui tan phurrit nasa tak a nih avang leh stamp duty kalphung kalh a nih avangin MNF-in an duh lo hle tih an sawi a, "Indian Stamp Act, 1899 hi sorkarin a khua leh tuite thil neih a chhinchhiahna atana dan siam a ni a, a hming lekin stamp duty chawi tur a ni," an ti. Union Minister Venkaiah Naidu pawhin, "Stamp duty was originally collected to maintain the register, now it has become a source of revenue. Charging this on affordable housing people will be a burden," tiin a sawi tawh niin an tarlang.

MNF ṭhalaite tarlan danin, stamp duty dan, Assam state aṭanga Mizoramin a chhawm luh chu Congress sorkar lai, kum 1996-ah siam ṭhat niin, sang uchuak takin sum tuak nan hman an tum a, mahse, a punna a nasat avangin hman mumal a ni lo. MNF sorkar lai, kum 2007-ah dan chu siamṭhat a ni a, ram hlutna aṭanga 0.5% chawi tura tih niin, a sang berah pawh Rs. 500 aia tam lo chawi tur a ni.

Dan chu March 2016-a Assembly session-ah tihdanglam a ni a, chumi hmang chuan Rs. 500 chawina ṭhinah Rs. 1,00,000-te chawi a ngai ta nia sawiin, MNYF chuan, "Tihhniam a nih hma chuan hma kan la dawn a ni," an ti.