KHAWTHLIR
Thisen pe
Keifang Bial KTP chuan nimin khan blood donation camp an huaihawt a, Aizawl Civil Hospital tan mipa 73 leh hmeichhia pakuate'n thisen unit 82 an pe.
Induction training
Administrative Training Institute leh Kolasib DC Office ṭangkawp chuan, nimin khan SIRD, Kolasib-ah All India Induction Training Programme an buatsaih ṭan. ATI director SC Shashak chuan, training-a telte chu sorkar hnathawkte'n mipui rawng an bâwlnaah hlawk taka hman a nih theih nan training chu chhawr
ṭangkai turin a chah.
Sangha khawi zir
Fisheries department chuan, nimin khan Serchhip CMO conference hall-ah Serchhip khawpui chhunga sangha khawitu thlan chhuahte tan training an buatsaih a; sangha khawi tura thil pawimawh hrang hrangte an zirtir.
Delhi-ah Rohluna
School Education minister H Rohluna leh director K Lalthawmmawia te chuan sorkar laipuia School Education department mamawh hrang hrang sawipui turin October 23, 2016 khan New Delhi an pan. Delhi-a an châm chhungin CABE meeting-ah an tel ang a, Human Resources Development Minister an hmu bawk ang.
Lungleiah UN Day
Zo Reunification Organisation (ZORO) chuan nimin khan Saikuti Hall, Lungleiah UN Day vawi 71-na an hmang a, Aizawl leh hmun hrang hranga ZORO-a inhmangte an tel. UN Day hi Lunglei High Power Committee chairman S Laldingliana, MLA-in khuallian niin a hmanpui a ni.
Sing 8 zawk
Nimin Vanglaini-a tarlan PWD-in kum 2016-17 ah kawng siamna atan km. khat zelah Rs. 18,000 an nei tih chu Rs. 80,000 tih zawk tur a ni. Kawng siamna atana sum ruahman hmang hian culvert siam ṭhat ngai, drain siam ngai leh retaining wall chhiate pawh siamṭhat a ni.