Khanpui-Tualbung kawng siamna tur DoNER-in sum an pe chhuak duh lo

Khanpui-Tualbung kawng siam hna chu, a nih dan tur anga hna thawh a nih loh avangin thawh chhunzawmna tur sum pek chhuah a ni tawh lo.

Vanglaini palai zawhna chhangin PWD chief engineer (Roads) K Lalsawmvela chuan, "Khanpui-Tlabung kawng hi thawnthu nei a ni a, a tira thawh tur anga thawh a nih loh avangin harsatna a awm a, DoNER-in sum an rawn pe chhuak duh tawh lo," a ti.

K Lalsawmvela sawi danin, Khanpui-Tualbung kawng hi km. 7 laih tura tih a ni a, mahse, kawng laihna tur pawm a nih lai aiin sum sanction chhuah hnuah thil man a to tawh avang leh scheme dang aṭangin km. 2 vel laih a nih tawh avangin sum pe chhuaktu DoNER ráwn loin PWD-in contractor chu km. 5 lai turin work order a pe.

A tìra ruahman anga kawng laih a nih tâk loh avangin DoNER chuan sum a pe chhuak zawm duh lo. Hei vang hian PWD chuan contractor pek tur sum an nei tawh lo a, contractor-in hna a thawk chhunzawm duh tawh lo.

PWD Chief Engineer chuan km. 7 chu laih pawh ni se, Khanpui-Tualbung kawng chu a tlang thei lo hrim hrim nia sawiin, "Kawng hi laih tlang a nih theihna atan sum dang kan dil leh mek a ni," a ti.

Kawng siamna atana sum hmuhna DoNER hnuaia NLCPR chuan pawisa ṭum thum a pe tawh a, a vawi khatna chu NLCPR webiste-ah a awm tawh lo a, a vawi hnihna chu 24.3.15-ah niin, nuai 29.84 sanction a ni. A vawi thumnaah chuan cheng nuai 24.87 sanction a ni a, sanction ni chu 17.11.2015 a ni.

Khanpui-Tualbung kawng siamna atan hian cheng nuai 138.12 ruahman a ni a, chuta ṭang chuan NLCPR aṭanga hmuh tur chu cheng nuai 124.31 (90%) niin, a bak nuai 13.81 (10%) chu Mizoram state sorkar tum tur a ni.

Zawhna chhangin Tual-bung khawtlang hruaitute chuan, "Kan khaw lamah chuan hmalakna hmuh tur a la awm lo a, Khanpui lam aṭang chuan hna thawh ṭan a ni tawhin kan hria," an ti.

Khanpui aṭanga thu dawn danin, kawng hi km. 5 vel laih a ni tawh a, hmun ṭhenkhatah luikawr siam a nih bakah, hume pipe phûm a ni a; mahse, a chhe leh vek tawh. Hna hi 2015 kum tawp lam aṭangin thawh a ni tawh lo a, kuminah chuan thawh chhunzawm a ni tawh lo hrim hrim a ni.