Gas harsat chhan chu dan loa kalpui vang a ni - MCU

Mizoram Consumer Union (MCU) chuan thuchhuah siamin, tunlaia eirawngbawlna gas-a harsatna hrang hrang awm chhan ber chu, Indian Oil Corporation (IOC) leh distributor-te'n sorkar laipui policy zâwm loa gas-a sumdawnna an kalpui vang niin an tarlang.

MCU chuan, India ramah Direct Benefit Transfer of LPG (DBTL) tihhlawhtlin vek a ni tawh a, consumer-te'n awlsam taka gas an hmuh theih nan online refill booking tih vek a ni tawh tih an sawi a, "Online booking lo chuan company-in refill supply an pe chhuak thei tawh lo. Mizoramah chuan distributor-te'n dik lo takin an duh duh consumer number hmangin an book a, consumer book-tu hminga kal chu an duh duhnaah an pe chhuak ṭhin. Hei hian black market leh gas tihchingpenna chi hrang hrang a siam a ni," an ti.

Gas distributor-te'n gas chu an duh duhnaah an pe chungin, a book-tu consumer hnenah an pe vek angin company-ah an report ṭhin nia sawiin, MCU chuan, "Online anga kalpui ang si, manual system-in an duh lai laiah an kalpui avangin harsatna a awm ṭhin a, subsidy pawh a luh kim loh chhan ber a ni," an ti a; dan ang taka consumer-te'n gas an hmuh theih nan DBTL chu kalpui thuai turin IOC leh Mizoram sorkar an phût.

MCU tarlan danin, IOC dan ang chuan distributor-te'n IOC-a zir chhuak trained mechanic an nei vek tur a ni a, gas connection installation, gas pût complaint leh a himna chungchangahte kum hnih danah consumer-te an endik ṭhin tur a a, endik man Rs. 75 niin, cash memo an pe ngei tur a ni.

Marketing Discipline Guide-lines, 2014 ang leh FCSCA Director order angin distributor-te'n gas an semin a bûkna an keng ngei tur a ni tih sawiin, MCU chuan, "Veng tinah YMA, VC/LC-te'n an lo bûkpui zel hi MCU chuan lawmawm kan ti a, a bûk dik tak consumer-te'n an neih theih nan chhunzawm zel ni se," an ti.