ST certificate pek chhuah tawh pahnih Home department-in a hnâwlsak tawh

Aizawl DC leh Serchhip DC office-in tribal certificate a pek chhuah zinga pahnih chu Home department-in pawmpuina a pe thei lo tawh.

Kil hrang hranga an chhui kuala an zir chian hnuah 'The Mizoram Scheduled Tribe and Scheduled Castes (Regulation of Insuance and Verification) Community Certificates Act 2014 (Act no 5 of 2014)' hmangin a hnâwl.

Thu dawn danin, Mizo zirlai, phai lama technical course zir tur leh thil danga hmang ṭangkai duhte'n tribal certificate an lak chu Home department-in The Mizoram Scheduled Tribe and Scheduled Castes (Regulation of Insuance and Verification) Community Certificates Act 2014 angin a pawmpui a ngai a; hei hi phaia lehkha zir tur Mizo ṭhenkhatin an hriat loh vangin an buai phah ṭhin.

He dan hi kum 1994-a Supreme Court-a Kumari Madhuri Patil leh Additional Commissioner-te inkhinna aṭanga piang a ni a; kum 1994 aṭangin India rama state zawng zawngin neih vek tur a nih laiin, Mizoramah chuan August 1, 2014-ah Chief Secretary-in hriattirna chhuahin hman ṭan chauh a ni.

He dan hmang hian DC Office-te'n tribal certificate an pekte chu endika an pawmpui zel a ngai a; uluk taka an zir chian hnuah ST certificate chu a dam hun chhung bithliah neiin pawmpuina a lo pe ṭhin.

Home department-in tribal certificate pek tawh a pawmpui theih loha a hnâwl tawh pakhat chu, Gorkhali, Aizawla David Kitchen neitu neitu a ni a; a ST certificate-ah chuan Mizo hming a hmang. Hming ṭhenkhat a ziahnaah a chángin a pa hmingah H Luaia a ti a, a chángin John Zimik tiin a ziak a; hei vang hian Home department chuan a pawm-pui thei lo a ni. Birth certificate pawh Eco-no-mic & Statistics department-in an lo pe chhuak hman tawh bawk.

Certifcate an hnawlsak tâk hian Mizoah sâ a phun niin sawi mah se, Home department chuan, hnam dangin Mizoah sa an phun thei lo a, Mizo hnam zinga hnam hrang hrangin Mizo hnam dangah chauh sa an phun thei niin an sawi. A awmna veng Local Council leh NGO-te pawhin 'Mizo anga ngaih tur' tiin an ziak a; mahse, Home department chuan 'anga ngaih' tih ringawt chu dânin a pawm theih loh vang leh document lem a hman nasat avangin an pawmpui thei lo a ni.

Home department chuan Serchhip DC Office aṭanga tribal certificate nei MK Khan s/o PC Sangkhuma tia ziak pawh an hnâwlsak tawh. Ani hi Kashmiri Pandit niin, man chhuah a nih hnuah a certificate chu hnâwl a ni a, a inthiam loh avangin a lehkha pawimawh zawng zawng chu Home department-ah a pe vek a ni.

The Mizoram Scheduled Tribe and Scheduled Castes (Regulation of Insuance and Verification) Community Certificates Act 2014 (Act no. 5 of 2014) hi tunlai hian sorkar chuan a Rules tur a duang mek a, peih thawkhat a ni tawh.

He dânin thuneihna a neih dan chu Quasi Judicial tih a ni a, Court rorelna anga thuneitu a ni. Thubuai siam duh an awm chuan High Court-ah chiah khin theih a ni a, a aia hniam Court-ah khin theih a ni lo. Hetiang dân hi hman ni mah se, Aizawla hmeichhe pakhat chu Supreme Court thupeka dân inziak dang angin an pawmpui thung.

Supreme Court judgement-ah chuan, hmeichhe pakhat awmna veng V/C leh NGO-te'n an pawmpuina a pawimawh tih a awm avang leh a awmna vengte'n an pawmna an ziahsak avangin Home department hnuaia Screening Committee a paltlang a ni.

Home department hotute chuan, tribal certificate nei thei loin an neihin, Mizote leh tribal-te hamṭhatna chi hrang hrang neih ve an tum zel dawn avangin a him lo niin an sawi a; tribal-te hamṭhatna chi hrang hrangah an hman theih dawn avangin fimkhur a ngai hle tih an sawi bawk.