MzSRLM hnuaia Facilitator tan training

Mizoram State Rural Livelihood Mission (MzSRLM) hnuaia District Level Community Facilitators Training chu nimin khan Serchhipa BNRGSK hall-ah neih a ni a, Serchhip DC Dr Lalrozama'n a hmanpui.

Dr Lalrozama chuan, sorkarin chhungkuaa nu dinhmun a ngaih pawi-mawh thu sawiin, "Nuin chhungkaw tan a theihna zawng zawng a hlan ṭhin a, hna thawka a chhuah bo chuan in chhung leh fate enkawltu tur an awm lo a, harsatna a thleng ṭhin. Chutiang harsatna chu engtia sutkian tur nge ni ang tih ngaihtuah chungin, nuin hna thawk chunga chhung-kaw enkawl hna a thawh kawp theih nan self help group ruahman a ni," a ti.

Serchhip DC hian Serchhip RD Block huam chhung khaw palia village organisation pasarih leh East Lungdar RD Block chhung khaw pakuaa village organisation pakuate hnenah computer a hlan a ni.

Serchhip district-ah hian hmeichhiate hmasawnna tur leh eizawnna ngêlnghet siampui turin self help group 452 a awm mek a; khaw tina self help group-te inthlun khawmna turin village organisation dinpui vek a ni tawh bakah, office pawh changtlung taka dinpui a ni tawh.