Police kut thlaktua puh mi 3 an man Vanghmun aṭangin 1 a tlan chhuak

April 18, 2020 tlai dar 4 vela Covid-19 vanga inkhârkhip kenkawhnaa New Kawnpui, Mamit district-a police duty, 5th IR Battalion mi leh sa pahnih kut thlaktua puh mi pathum man a ni tawh a, pakhat nimin khan a tlan chhuak.

Mizoram police hotute aṭanga thu dawn danin, mi pathum mante chu Chakma vek an ni a, Tripura police-te'n an kawl mek. Man tawhte chu - Santilal Chakma (31) s/o Charan Chakma, Bimal Chakma (19) s/o Rasikya Chakma leh Mohanlal Chakma (27) s/o Sukalmoni Chakma te an ni a, Tripura-a Kawnpui-I khaw mi vek an ni.

Vanghmun YMA hruaitute hnen aṭanga thudawn danin, nimin khan mi pathumte hi Tripura Police-te chuan Kanchanpur-a court-ah hruai an tum a, chumi hma chuan an hriselna dinhmun endik turin Vanghmun PHC-ah hruai an ni. PHC-a an awm lai hian pakhat chuan a zun chhuah thu sawiin, zung tura an hruai laiin a tlan chhuak a ni.

Mi pathumte hi Mizoramah hruai an nih theihna atan court-ah phalna dil tum a ni a; kut inthlak thubuaiah hian inhnamhnawih dangte pawh zawn mek zel a ni.

Hetih lai hian, kut tuar police pahnihte chu Aizawl Civil Hospital-ah zan khat enkawl an nih hnuah nimin khan chhuahtir an ni a, an in lamah an inenkawl mek.