KDZKT Road siam chak turin phût

MZP headquarters, Zawlnuam chuan thu-chhuah siamin, KDZKT Road an siam mek chu chak zawka hna thawk tur leh mipuite tana harsatna siam lo zawnga thawk turin a siamtu ABCI company an phût.

Zawlnuam MZP chuan, KDZKT Road-a Kawrthah leh Kanhmun inkar kawngpui chu a chhe lutuk nia sawiin, "Lirthei tan tlan hleih-theih loha a awm mek hi a rang lama thawm ṭhat hna thawk turin ABCI-te kan ngen a ni," an ti.

Zawlnuam MZP chuan, anmahni duh thu ngeia Mizoram chhuahsantu Bru-te Mizorama hruai kîr leh tuma hmalakna awm mek chu lawm-awm an tih thu sawiin, "Mizoram mi leh sa dik takte chu lo let leh ngei tur-in kan sáwm a ni," an ti a; Mizoram mi dik tak chiah hruai kîr an nih theih nan te, Mizoram an chhuahsan hmaa an awmna khuaah ṭheuh an awm leh theih nan leh, khaw pakhata chhungkaw tam tak dah khawm lo tur-in thuneitute an ngen a ni.