Kawnpui YMA, Excise leh Police te'n ruihhlo do zel dan tur sawiho

Kawnpui Jt. YMA, Police leh Excise & Narcotics dept. ṭangkawp chuan nimin khan Kawnpui Venglai YMA hall-ah ruihhlo dona kalpui zel dan tur an sawiho.

Meeting kaihruaitu Kawnpui Jt. YMA president R Lalzawmliana chuan Kawnpui khaw chhungah zu leh ruihhlo a hluar nasa tih sawiin, "Ruihhlo ti thar an pun avangin HIV tihdarhnaah nasa takin nghawng a nei a, chumi avang chuan YMA chu a mangang tawh. Theihtawp kan chhuah chung pawhin duhthu a sam thei loa; kan do hneh meuh lo a ni," a ti.

Kolasib SDPO Lalruatkima chuan ruihhlo donaah theihtawp chhuah ho a ṭul thu sawiin, "YMA ten mi an manin police lam te case-a kan chak theih nan witness kan neih ṭhat a pawimawh," a ti a, ruihhlo donaah dan pal zut si loa, huaisen taka kal ṭhat thu a sawi.

Thusawitu dang, Kolasib Excise OC VL Lura chuan Kolasibah Excise & Narcotics staff 42 chauh an awm avang-in an indaih lo hle tih sawiin, "Kan dote hian thla an thlah si loh avangin keini pawhin tha thlah loa kan tan tlan a ngai tak meuh meuh. Supreme Court order angin National Highway aṭanga metres 100 aia hnaiah wine shop awm phal a nih loh avangin, Kolasib district chhunga zu zawrhna dawr 5 te chu kumin chhung ngeia insawn turin hriattirna pek an ni," a ti.

Meeting-ah hian zawhna leh chhanna hun hman nghal a ni.