Loneitute harsatna a theih ang angin kan pui ṭhin - Agriculture Minister

Agriculture minister C Lalrinsanga chuan loneitute'n harsatna an tawh department hnena an thlen ṭhin thu sawiin, "Harsatna an rawn sawiahte a theih ang angin kan pui ṭhin," a ti.

Vanglaini palai zawhna chhangin Agriculture Minister chuan, loneitute'n harsatna an tawhte telephone hmanga an thlenna tur helpline an siam thu a sawi a, "Kan beisei aiin helpline an rawn be nasa. Loneitute'n harsatna an tawh an rawn thlente chu department lamin uluk taka zir chiangin, an theih angin an tihhlawhtlinsak ṭhin," a ti a; loneitute harsatna tawh ber chu thlai chî a nih thu a sawi.

C Lalrinsanga chuan, thlai chi leh hlo kahna loneitute'n an neih theihna atan district bawrhsapte hnenah loneitute mamawh zawrhna dawrte hawn phalsak turin an ngen tih sawiin, "Hun bituk neiin hawn a ni a, loneitute'n an hmang ṭangkai hle," a ti.

Thlai chî chu a hlâwmin hmun khatah an pek loh thu sawiin Minister chuan, "Hetiang boruak a lo thleng thut dawn tih hriat lâwk a ni lo nen, thlai chî-ah pawh kan intodelh lutuk lo hrim hrim a ni," a ti a; hmun khata loneitute pek ṭeuh ai chuan a inrual thei ang bera sem chu an kal dan a nih thu a sawi.

C Lalrinsanga chuan, leilet neitute'n buh chî leh lei lehna atan power tiller an mamawh thu an thlen ṭhin thu sawiin, "A theih ang angin buh chî kan pe a, power tiller pawh an hman theih dan tur kan ngaihtuahpui," a ti.

Agriculture Minister chuan, loneitute'n chawa rin theih bâl, bahrá leh káwlbahráte chíng uar se a duh thu sawiin, "Kan hma lam hun a hriat lâwk loh. Insawiṭhaihna lam a ni lo a, kan boruak avangin state tam takin an buh thar chhuahte state danga hralh an remti lo ve thei a ni," a ti a; leilet neitute pawhin hnam dang chhawr lo a, an buh thar chhuahte Mizorama tihral vek theih dan tur ngaihtuahse a duh thu a sawi bawk.