ZPM MLA-te'n Cold Room enfiah an duh
ZPM Legislative Party (ZLP) chuan, Horticulture department siam, Cold Chain Development Project hnuaia Sairanga thlai hring vawn ṭhatna Cold Room chu Chief Minister hmalaknaa enchhin a nih thu April 4, 2020-ah sorkarin a puan tawh laiin, thlai thar vawn ṭhatna atana mamawh chhuar (rack) a la awm lo tih an tarlang. Chhuar awm loh vanga thlai a nih tur anga dahṭhat theih a ni lo chu enfiah ṭha an tih thu an puang.
Cold Room hi nimin khan ZPM Legislative Party member panga - Lalduhoma, C Lalsawivunga, VL Zaithanzama, Lalchhuanthanga leh Dr Vanlalthlana te chuan an tlawh a ni.
ZLP chuan, thlai quintal 800 vel dah theihnaah bawkbâwn tlem azawng ip chhunga khung khawma dah a la ni chauh leh thlai tam tak a ṭawih chu pawi an tih thu an sawi a, "Hmanni lawkah Cold Room aṭanga Aijal Club-a zîkhlûm lak chhoh nasa taka thenfai ngai a nih chungchangah kut hnathawktute zawk mawhpuhna a awm hi a pawi kan ti. A hmuna kan enfiahna aṭangin zîkhlûmte hi Cold Room-a dah luh a nih pawh hian thenfai a ngai tawh reng a ni tih a hriat," an ti.
ZLP-in sorkar an ngen
1.India state danga Mizo awm tangkhangte list siam vat tur leh a rang lama langtlang taka
ṭanpuinate pek an nih theih nan sorkarin hma la rawh se.
2.Local level task force-ah ni tina ei zawng, an eizawnna kalsan leh thlai chî pawh tuh hman loa hah taka duty-te tan central leh state sumin a mamawhte hnenah mumal takin chhawmdawlna siamsak rawh se.
3.Ni tina ei zawng, inkhârkhip vanga inhlawh thei lote hi central leh state sumin chhawmdawl dan ngaihtuah ni rawh se.
4.Covid-19 vanga mimal, pawl leh kohhran aṭanga CM Relief Fund-a sum lutte hman a nih dan hi langtlang takin mipuiah puanzar ṭhin ni rawh se.
5.Thingtlang leh khawpuia tlawmngaia duty-te'n Covid-19 laka invenna atana an mamawh sorkarin pe ṭhin rawh se. Point 1-na aṭanga 5-na hi sorkar hian ‘package’ angin puang thei se a lawmawm hle ang.
6.April 18, 2020-a New Kawnpui-a kan 5th IR Bn. duty-te'n Chakma kut an tuar hi a pawi kan ti a, hliamte kan tawrhpui tak zet. 'Hetiang thil a thlen leh chuan...' tia invaupûng tawh loin a takin kan sorkar hi che chhuak rawh se.