Tlabung lamah hripui kai rinhlelh an awm lo

Lunglei High Powered Committee (HPC) vice chairman Lawmawma Tochhawng, MLA chuan nimin khan Tlabung sub-division chhunga Bangladesh ramri hrûl khuate a tlawh a, ramria venhimna kalpui dan a en. Tlabung sub-division chhunga coronavirus screening point pathumah rinhlelh an la awm lo tih tarlan a ni.

HPC Vice Chairman hi Lung­lei aṭangin HPC member-te'n an ṭawiawm a; Tlabungah West Tuipui bialtu MLA Nihar Kanti Chakma, SDO (Civil) Lalsang­lura leh sorkar official dangte leh, ramri vengtu Border Security Force (BSF) battalion pahnih - 131 BSF commandant KS Nautiyal leh 60 BSF commandant mawhphurhna la mektu Suhel Ahmed ten an lo dawngsawng.

Lawmawma Tochhawng hian Mizoram leh Bangladesh inrìna bula Kawrpuichhuah, Bindiasora leh Tipperaghat khuaa border outpost (BOP), border fencing (ramri hungna) leh gate-te a tlawh a; BSF hotute chuan Lung­lei district-a BOP 26-ah BSF sipaite engtik lai pawhin uluk taka an duty reng thu hrilhin, Mizoram sorkar official te, police leh task force-te nen ṭha takin an thawkho a, tun dinhmunah ramri ven kawngah harsatna an neih loh thu an sawi.

BSF hotute sawi danin, Mizorama India leh Bangladesh inrina chu km. 318-a thui a ni a, Lunglei district-ah km. 112-a thui a awm. Ramri piah lam, Bangladesh ram chhunga Rangamati district-ah Covid-19 vei hmuh an la awm lo.

Lawmawma Tochhawng chuan, Covid-19 chu inkai chhâwn awlsam tak a nih avang­in ramri venhim hna thawktute chu thâ thlah loa uluk leh fimkhur taka duty zel turin a chah.

Lunglei HPC Vice Chairman hi Tlabung SDO (C) pisaah sorkar official-te leh task force hruaitute nen an inkâwm a; task force-te inpekna leh thawhrimna fakin, fimkhur lehzuala duty zel turin a fuih.

Tlabung damdawi-ina me­dical officer Dr R Lalnienga sawi danin, Covid-19 laka invênna atan Health department hmalaknain February 10, 2020 aṭangin Kawrpuichhuahah ‘Coronavirus Screening Point’ siam a ni a, ni tin medical team an duty ṭhin. March 2-ah Tlabung Missionary Kai leh Licheng Kaiah screening point siam belh niin, March 20 thleng kalpui a ni. Screening kalpui chhungin Covid-19 kai rinhlelh an awm lo.

February 19-ah Tlabung Sub-Division Task Force on Mi­tigation of Coronavirus din a ni a, Tlabung damdawi-inah Covid-19 vei rinhlelhte dah hran­na tur khum pathum awmna isolation ward siam a ni.

Mizoram páwn aṭanga hawte dah hranna (quarantine centre) atan Tlabung Tourist Lodge hman a ni a, mi 12 dah luh tawh niin, an zinga mi 11 chu quarantine period an hman zawh thlenga insawiselna an neih loh avangin chhuahtir an ni tawh a, mi pakhat a la awm mek. Mahni ina inkhung hrang (home quarantine) mi 90 an awm tawh a, an vaiin quarantine period a zo tawh a ni.

Tlabunga FCSCA inspector R Lalzirliana'n buhfai leh mipui ni tin mamawh dang a awm ṭhat thu a sawi bawk.