Mamit MJA-in Chhiatna thleng an tlawh

MJA, Mamit district member-te chuan April 18, Inrinni tlaia thlipui leh ruah thawkin Mamit khawpuia hmun ṭhenkhat leh Dampui khuaa in a tih­chhiatte leh kawlphetha hrui a tih­chhiatte a hmunah nimin khan an tlawh.

Mamit MJA chuan, Mamit khawpui chhung leh a chhehvel khuate'n ni khat leh zan khat power supply an dawng tawh lo tih sawiin, "Electric line chhe lai leh thing tluin a delh chhiatte siamṭhain Power & Electricity department engineer hoin mi 40 velin beihpui an thlâk a ni," an ti a; an ei leh in atan bawnghnute leh chhang an pe.

P&E department hotute chuan, an hna hautakzia hriaa MJA hruaitute'n ei leh in tur an pe leh an hnathawhna hmun an enpui chu lawmawm an tih thu an sawi.

Mamit MJA chuan, Mamit khawpui leh a chhehvel khuate êng pekna hrui chu West Phaileng aṭangin Dampui leh Zongaw paltlangin a kal tih sawiin, "Thli leh ruah thawk hian a tichhe fo a, hei vang hian Mamit khua hian fûr laiin power supply a nei ṭha lo ṭhin hle. Tunah hian Bairabi aṭanga power lakna tur project cheng nuai 5,000 chuang sênna tur thawh mek a ni a, kum khat hnuah chuan hman theiha peih beisei a ni," an ti.