Court-ah defence council an ding lo Thubuai ngaihtuahah harsatna a thlen

Police-in mi an man, Aizawl District & Session Court-a ukil dinsaktu nei lote dinsaktu, defence council-te chu an fee tihpun phûtin Court-ah chawlhkar khat chhung an ding duh lo tawh a, Court-a thubuai ngaihtuahnaah harsatna a thleng mek.

Thu dawn danin, Mizoram sorkar chuan police-in thubuai lian tham deuh - tualthah, pawngsual, ralthuam tawlhrûk leh thil dang ṭhenkhat kaihhnawiha mi an man, Court-a dinsaktu ukil nei lote dinsaktu atan ukil a ruai a, ukil fee pawh sorkarin a tumsak ṭhin. Defence council-ah ukil hna kum sarih chin thawk tawh ruat theih a ni a, tun dinhmunah sorkar chuan defence council atan mi 20 vel a ruai a ni.

Defence council-te hi October 17, 2016 aṭang khan an fee tihsan phûtin Court-ah an ding duh lo. Vanglaini zawhna chhangin Court-a thawkte chuan, defence council-te an din duh loh avangin Court-in harsatna a neih phah tih an sawi a, "Ukil nei lo chuan rorel theih a ni si lo a, ukil rawihna nei lote thubuai ngaihtuah theih a ni lo," an ti.

Defence council-te'n Vanglaini an hrilh danin, tun dinhmunah an fee chu vawi khat dinah Rs. 700 a ni a, Rs. 1,500-a tisang turin a thuphunga pawm tawh a ni.

Fee thar tura rawtna chu a thuphunga pawmna rei viau tawh mah se, a taka tihhlawhtlin theih a nih loh avangin, lungawi lohna lantir nan Court-ah an ding duh tawh rih lo tih sawiin, defence council-te chuan, "Kan fee hi tihsan a nih hma chuan Court-ah hian din kan tum tawh lo," an ti.

Hetih lai hian, Mizoram sorkar chuan kumin kum tìr lam aṭang khan Gauhati High Court-a ukil an chhawrte hlawh pawh a tihniamsak vek a ni.