MLA-in kawng chhiat thu Union Minister-ah a thlen

West Tuipui bialtu MLA Nihar Kanti Chakma chuan, nimin khan New Delhi-ah Ministry of Road, Transport & Highways minister Nitin Gadkari hnenah Lunglei-Tlabung kawngpui, National Highway 302 chhiat thu a thlen.

NK Chakma chuan, Lunglei-Tlabung kawngpui chu buhfai phurte pawhin an zawh ngam loh khawpa chhia a nih thu thlenin, "Thawm ṭhat a nih loh reng chuan he kawng zawhtute hi harsatna lian zawk tâwk thei reng kan ni," a ti.

NK Chakma hian August 3, 2016 khan kawng siam ṭha turin Ministry of Road, Trannsport & Highway-ah ziakin ngenna a thlen tawh bawk.

Nitin Gadkari nen an inkawmnaah hian Nihar-a chuan, ṭum eng emaw zat MoRTH-ah NH-302 kawngpui siam ṭhat a ṭul thu lo thlen tawh mah se, hmalakna mumal a awm lo niin a sawi a, "Hemi chungchangah hian chhanna pawh ka dawng lo. He kawng hi West Tuipui bial mipuite châk lakna ber a nih avangin thawm ṭhat thuai a ṭul a ni," a ti.

NK Chakma chuan, 2016 kum tirah sorkar laipuiin NH-302 chu siam ṭhat thuai a nih tur thu a lo hriattir tawh niin a sawi a; mahse, MoRTH hnena rawtna thehluh tih loh hmalak zuina a awm lo tih a sawi bawk.