AH&Vety-in hmalakna an thlirho

AH&Vety department chuan nimin khan an minister Dr K Beichhua hoin a pisaah inkhàrkhip chhunga an hmalakna hrang hrangte an thlirho.

Dr K Beichhua chuan, United Kingdom aṭanga vawk chi ṭha lak luh tum chungchangah Union Animal Husban­dry, Dairying & Fisheries minister Giriraj Singh a biak thu sawiin, "Inkhârkhip vanga Delhi aṭanga Mizorama la lut tura harsatna awm leh phalna neih ngaite chu Union Minister hian a tifel dawn," a ti.

AH&Vety department chuan UK aṭangin vawk chi ṭha 45 a la lut tawh a, chu'ngte chu Delhi quarantine centre-ah hun rei tak khung hran ni tawhin, an hriselna pawh endik vek tawh a ni.

Meeting chuan, Assam leh Arunachal Pradesh-ah vawk pûl hri African Swine Fever a lèn mek avanga ICAR-National Research Centre on Pig Rani, Guwahati aṭanga thurâwn hmuh angin, ram chhung leh pawn aṭanga vawk lak luh khapna ding lai chak taka kalpui ni se, an ti.

Inkhàrkhip vanga Mizoramin ei leh bara harsatna a tawh theih laka invênna atan district hrang hranga an department ran chaw chìnna hmunah vaimim a tam thei ang ber chìn an rél a; tun hnaia Mizoram khawchhak lama chhinghne rualin sial a seh hlum chungchangah, a ven dan tur ruahmanna a rang lama siam ni se, an ti bawk.