Bru endik turin inpeih

Kumin November thla tìr aṭanga Tripura refugee camp-a Bru awmte Mizoram khua leh tui dik tak an nih leh nih loh enfiah dan tur ngaihtuahin, nimin khan Home secretary Renu Sharma hoin Secretariat conference hall-ah sorkar official-te an ṭhukhawm a; ruahmanna peih a nih tawh thu an tarlang.

Meeting-ah hian Home department hotute, Lunglei, Mamit leh Kolasib-a district DC leh SP bakah, PWD, Finance leh Supply department hotute an tel. Bru-te endik tura tihfel ngai leh ṭul hrang hrangte sawiho a ni a, hemi atana Mizoram sorkar tih turte chu peih vek a nih tawh thu tarlan a ni.

Vanglaini palai zawhna chhangin Home additional secretary Lalbiakzama chuan, Bru endik hna thawh zawh a nih hunah hruai kîr hna ṭan tum a nih thu a sawi a, "Hruai kîr hna hi January, 2017 aṭanga ṭan turin kan rawt a, mahse, sorkar laipuiin an pawm lo. Ruahmanna an rawn siam ang," a ti.