Sorkarin gas phur tur truck 9 a hmu tawh
Mizoram sorkara Food, Civil Supplies & Consumer Affairs (FCSCA) department chuan, Mualkhang Gas Bottling Plant aṭanga eirawngbawlna gas phur turin hma a la mek a; nimin thleng khan gas phur tur truck pakua an hmu tawh.
FCSCA secretary Dr Franklin Laltinkhuma'n Vanglaini palai zawhna chhanga a sawi danin, IOC gas transporter-te'n tender an chhan dan anga gas an phurhna rate chu a hniam lutuk a; Mualkhang
aṭanga Mizoram hmun hrang hranga an phurhna rate chu km. khatah gas bûr khatah Re. 0.129 a ni a, Borkhola aṭanga Mualkhang thleng phurhna rate chu gas bûr khat km. khatah Re 0.187 a ni.
Transporter-te'n gas an phurh
ṭhinna rate chu a hniam lutuk avangin Mualkhang aṭanga Mizoram hmun hrang hrang Supply department hnuaia gas phur tur truck-te chu sorkarin an phurh man pek belh a tum tih sawiin, Dr Franklin Laltinkhuma chuan, "An phurh man pek belh turin ruahmanna kan siam a, a zat turte kan chhût chhuak a, Finance department-ah kan thehlut tawh. Finance lam pawhin min lo dawngsawng ṭha khawp mai," a ti a; Finance department-ah hian nimin khan a thehlut tih a sawi.
Supply Secretary sawi danin, FCSCA department hnuaia gas phur tur hian truck pakua an hmu tawh a, chungte chu an registration number-te nen IOC hnenah an thawn thla tawh a ni.
FCSCA Secretary hian tun hnaia Supply Minister hoa IOC hotu te, gas distributor-te leh NGO hruaitute nena Secretariat Conference Hall-a meeting an neih ṭumin, Mizoramin tuna gas distributor 33 a neih mek bakah, distributor dang 33 mamawh belh a nih thu a thlen a; IOC hotute chuan an pek theih thu sawi nghal lo mah se, an hotu lúte nen an la ngaihtuah tur thu an sawi.
Gas distributor neih mek
leh mamawh belh zat
# Khua Distributor Mamawh
Awm mek Belh zat
1. Aizawl 11 4
2. Lunglei 2 3
3. Lawngtlai 1 2
4. Saiha 1 2
5. Mamit 1 2
6. Serchhip 1 2
7. Champhai 1 2
8. Kolasib 1 2
9 N.Vanlaiphai 1 1
10. Tlabung 1 1
11. Ngopa 1 1
12. Thenzawl 1 1
13. Vairengte 1 1
14. Saitual 1 1
15. Khawzawl 1 1
16. Kawrthah 1 1
17. Sangau 1 1
18. Hnahthial 1 1
19. Chawngte 1 1
20. Sakawrdai 1 1
21. Kawnpui 1 1
22. W. Phaileng 1 1
TOTAL 33 33