MR a dik loa bill tum an tam

Aizawl Civil Hospital (ACH)-in MJA member-te tana special clinic an buatsaih chu nimin khan ACH auditorium-ah khâr a ni a; medical reimbursement (MR) bill dik lo a tam thu in-khawmah hian tarlan a ni.

Inkhawm kaihruaitu ACH medical superin-tendent Dr KL Remsanga chuan, sorkar doctor-te chu an duh vanga mimal damdawi-ina thawk kawp an ni lo nia sawiin, "ACH-ah hian damlo kan inenkawl séng tawh lo a, mipui dinhmun ngaih-tuahin hospital dangah kan enkawl a ni. Mimal damdawi-ina thawh kawp hi châk reng vang a ni lo a, mipui mamawhna vang a ni," a ti.

Non Practicing Allo-wance (NPA) chung-changah Dr KL Remsanga chuan, ram leh hnam tan tia NPA la duh lo doctor tam tak an awm tih mipuiin hriatpui se a duh thu a sawi.

MJA president Van-lalrema Vantawl pawhin thu sawiin, chanchin-bumite chuan sorkar chu an dik lohnaah sawiselin, an tih ṭhatah chuan an fak ṭhin thu a sawi a, "Sorkar policy atan pawh ngaihtuah kan sêng ve nasa hle. Ram leh hnam tan kan theihtawp kan chhuah ve ṭhin a ni," a ti.

Inkhawma tarlan danin, ACH-a inenkawl MR bill tum zingah kum 2009-2016 chhungin bill dik lo eng emaw zat a awm a, chu mite sum dil zat chu cheng nuai 41 a ni a, bill dik lo a nih avangin hnâwl a ni. MR bill hi doctor-te'n an countersign ṭhin a, en mumal loh palh, damdawi pawh ni lo, cash memo dik lo thil tel rûk a lo awm ṭhin.

Damdawi-ina MR bill buaipuitute'n uluk taka an enfiahnaah cash memo dik lo an hmuchhuak ṭhin a, cash memo pakhatah chuan iron rod leina cash memo hmuh chhuah a ni. Kumin bikah MR bill dik lo hi Rs. 4,00,000 hû hmuhchhuah a ni.

ACH-te'n MJA mem-ber-te tana special clinic an buatsaih hi August 16, 2016-ah hawn a ni a, ACH doctor-te chuan a tahtawlin MJA member-te hriselna dinhmun an endik bakah, investigation tih ngaite a thlawn vekin an tihsak a ni.