KHAWTHLIR

NLUP sem

Lawngtlaia Agriculture department chuan nimin aṭang khan NLUP third phase leh fourth phase ṭanpuina an sem ṭan a, Lawngtlai East constituency-ah sem hmasain, October 29-ah sem zawh hman an tum. Ṭanpuina hi leilet (WRC I & II) leh oil palm thlangtute hnenah sem Rs. 20,000 ṭheuh leh fu thlangtute hnenah Rs. 16,000 ṭheuh pek a ni.

Motor intáiah thi

October 24, 2016 zan dar 7:30 vel khan Tuikual South-a Tuichhunchhuah bulah MS Dawngliana (32) s/o C Lalhmangaiha, Dinthar khalh 207 pick-up, MZ-01 D-6436 leh Karizma bike MZ-01 E-8762 an intái a; bike hnunga chuang Ramnunpari (33) d/o Sangthangi, Chanmari West chu damdawi-in thlenpui a nih hnuah a thi. Bike khalhtu Laldanmawia (40) s/o Khualchhawna, Chhinga Veng chu na lutuk loin a hliam bawk.

Lo neitute zirtir

KVK, Mamit district chuan nimin khan Mamit IPR conference hall-ah 'Protection of Plant Varieties and Farmers Right Act' tih thupui zirhona an buatsaih a; Mamit, Dár­lâk, Bâwngvâ leh Sai­khawthlira lo neitute hnen­ah an ham-ṭhatna leh thlai chi humhalh dan an zirtir.

Lehkhabu thar

Melvyn Vanlalhlimpuia lehkhabu buatsaih, 'General English Volume-2, Zoṭawnga English Zirna’ tih chu nimin khan Aizawl Press Club-ah minister C Ngunlianchunga'n a tlangzarh. C Ngunlianchunga chuan, changkanna ûm pha turin sap ṭawng thiam a pawimawh thu a sawi.

In saksak

Tlabung V/C bultumin khawtlang mipuite'n nimin khan Tlabung Chanmari-a hmeithai pakhat chenna tur in an saksak. Tlabung V/C-te hian in sakna tur hmanrua an lei bakah, châk dangte ram lamah an dap khâwmsak a; nimina hnatlangah hian mi 150 vel an thawk chhuak a ni.

Mamawh thlen

Central Young Chakma Association leh Central Mizoram Chakma Students’ Union hruaite chuan, nimin khan chief minister Lal Thanhawla a pisaah an kâwm a; Chakma Autonomous District Council huam chhunga mipui, a bik takin ṭhalai leh zirlai mamawh leh harsatnate an thlen.