NLUP-a vawk note sem dan tur rel November atangin sem tan tum

Nimin khan chief minister Lal Thanhawla hoin Chief Minister's Office (CMO) conference hall-ah AH&Vety department hotute an ṭhukhawm a; NLUP hnuaia vawk notê sem dan tur an sawiho.

Meeting-ah hian NLUP-a third phase leh fourth phase hnuaia vawk note sem dan tura AH&Vety department-in ruahman an siam chu an thlirhoa pawm a ni a; November 2016 aṭangin NLUP hnuaia vawk vulh thlangtute hnenah vawk notê sem ṭan leh ni se, an ti.

Ruahman ang chuan, vawk note sem tur chu tualchhunga vawkpui vulhtute aṭangin lei a ni dawn a, a theih chin chinah vawk note chu a semna tur khaw hnai aṭanga lak tum a ni.

Vawk note hi Village Level NLUP Committee leh District AH & Vety. Officer (DVO) te inrawnkhawmin ruahmanna an siam anga sem tur a ni. DVO chu ruahmanna an siam dan thla tin report pe tura tih niin, hei hi thla thum hnuah thlir ho leh ṭhin a ni ang.

Meeting-ah hian, Porcine Respiratory & Reproductive Syndrome (PRRS) chung-chang pawh sawi lan a ni a; AH & Vety hotute chuan,August 19, 2016 hnuaah PRRS vanga vawk thi report an dawn loh thu an sawi a, "Tun dinhmunah chuan vawk sa ei a him," an ti.

AH&Vety hotute sawi danin vawk damlote chu damdawi an pek aṭanga ni 21 hnuah chuan a sa mihring ei atan a him a ni.

NLUP third phase leh fourth phase-ah hian vawk vulh thlangtu mi 8,206 an awm a, vawk notê paruk ṭheuh pek tur a ni a, ṭum hnihah pek an ni ang.