Tlang ram lo neih hlâwk zawkna atan Sorkar leh JICA an thawk dun dawn

Mizoram sorkar leh Japanese International Cooperation Agency (JICA) chuan, tlang ram lo neih hlâwk zawka kalpui tur leh tuihnâ hnianghnâr zawka siam chhuah lama thawkho turin nimin khan Chief Secretary office conference hall-ah thawhhona thuthlung, Record of Discussion an ziak.

JICA hian tlang ram lo neih hlâwk zawka kalpui dan leh thlai châwmtu tuihna hnianghnâr zawka siam chhuahna atan ruahmanna, 'The Project on Capacity Enhancement for Sustainable Agriculture and Irrigation Development in Mizoram' tih an duang a; chumi kalpui tur chuan Record of Discussion hi ziah a ni.

Thawhhona thuthlungah hian Mizo-ram sorkar aiawhin chief secretary Lalmal-sawma'n hming a ziak a, JICA aiawhin JICA India office-a chief representative Takema Sakomoto-a'n hming a ziak.

Chief Secretary chuan, Mizoram sorkar leh JICA-in thawhhona thuthlung an ziak thei chu lawmawm a tih thu sawiin, "Kum thum chhung zir chianna aṭanga JICA-in Mizorama agriculture leh tui lakna tihhmasawna tur a duan chhuah hi a rintlak ngei ang," a ti a; JICA hotute chu an thil duan avangin lawmthu a hrilh.

Takema Sakomoto chuan, Mizoram sorkar nena thawhhona an nei thei tur chu an phûr hle tih sawiin, "Mizoram hi kan ram ang maia hmun nuam a ni. JICA leh Mizoram sorkar thawhhona hnuaiah Japanese mithiamte chah chhuah an ni ang a, anni chuan thingtlang lo neitute thawh chhuahte tam tham zawka peipun a nih theih nan theihtawp an chhuah dawn a ni," a ti.

The project on Capacity Enhancement for Sustainable Agriculture and Irrigation Development in Mizoram hi kum 2013 leh 2015 inkara Mizoram sorkar leh JICA mithiamten ‘The Study on Development and Management of Land and Water Resources for Sustainable Agriculture in Mizoram' tih huang chhunga zir chianna an neih hmanga JICA-in a duan a ni.

JICA leh Mizoram sorkar thawhhona hnuaia master plan-in hmalakna tur hmasa (pilot project) atana a thlante chu - Bilkhawthlir, Aibawk, Serchhip leh Champhaite a ni.

JICA hotute hian nimin tlai khan chief minister Lal Thanhawla chu a banglaah an hmu nghal a, JICA-in Mizorama hmalakna a neih mekte an hrilh.

Chief Minister chuan, Mizoram sorkar leh JICA-in agriculture leh tui lakna tihhmasawn nan thawhhona thutlung an ziak chu Mizoram hmasawnna atan méllung pawimawh tak a ni tih sawiin, JICA hotute chu lawmthu a hrilh.

JICA hotu Sakemoto chuan, thawhhonain a huam chin tur leh a tumte sawiin, "Thawhona hian JICA leh Mizoram inkarah thawhhona bung thar a hawng a ni," a ti a; an project kalpui mek bakah, inkalpawhna tihhmasawn nan NH-54 tihchangtlungna tur project an buaipui mek thu a sawi.