Hindi zirtirtute'n hlawh an hmu ang - Union HRD Minister

Sorkar laipuia Human Resource Development (HRD) minister Prakash Javadekar chuan, Mizo-rama CSS hnuaia Hindi zirtirtute'n an hlawh an hmuh ngei tur thu leh rawih chhunzawm zel an nih theihna atana hmalak a tum.

Sorkar thuchhuah tarlan danin, HRD minis-ter Prakash Javadekar hi New Delhi-a a pisaah Thawhṭanni khan School Education minister H Rohluna'n a hmu a, Mizorama CSS hnuaia Hindi teacher-te harsatna tawh mek chinfelsak turin a ngen.

Prakash Javadekar chuan, Hindi zirtirtute'n an hlawh an hmuh ngei tur thu leh Hindi zirtirtute rawih chhunzawm an nih theihna atan hmalak a tum thu H Rohluna chu a lo hrilh a ni.

H Rohluna chuan, Hindi zirtirtute'n March 2016 aṭangin hlawh an la lak loh avangin harsatna an tawh nasa thu sawiin, "Hlawh la lo chung pawhin ṭha takin hna an thawk a ni," a ti. CSS Hindi teacher-te rawih hun chhung February 2017-a tàwp mai tawh tur chu kum 2017 hnu lamah pawh rawih chhunzawm zel an nih theihna tura hma laksak turin Union Minister chu a ngen a ni.

Prakash Javadekar chuan, Mizorama middle school leh high school-ah Hindi compulsory subject-a ni chu lawmawm a tih thu sawiin, "Hindi teacher-te hian an hlawh an hmu ngei ang. A rang thei ang bera ûm zui turin a khawihtute ka hrilh nghal ang. He scheme hi Mizorama hman ṭangkai a nih dante enfiah thuai a, chhunzawm zel a nih theihna turin a ṭul angin hma ka la ang," a ti.

School Education Minister hi Mizoram House-a principal resident commissioner Arvind Ray, OSD Umakant leh School Education director K Lalthawmmawia ten an ṭawiawm a ni.