Sangau-Siaha kawngpui lài chat

Hnahthial-Sangau-Siaha kawng chu mi pakhatin zangnadawmna a phût vanga a laih chhiat hnuah leh, kawng laih chhiat helna tura kawng hlui chei a nâl avangin nimin aṭang khan lirthei an kal tlang thei lo a; mihring phur chi maxicab-te pawh an châwl nia thu dawn a ni.

Sangau aṭanga thu dawn danin, Sangau leh Siaha inkar kawngpui, BRTF enkawlin No-hranga ram a paltlang a, kum 2006-a laih a ni. Nohranga hian kum 10 a ral hnuah pawh zangnadawmna a hmuh loh avangin October 15, 2016-ah thuneituite hnenah zangnadawmna tifel turin a ngen a; hmalakna a awm lo nia a hriat avangin October 21 tlaiah a ram chhunga kawngpui kal chu a lài chat a, a ram chinah mau hmangin a ping nghal.

Nohranga'n kawng a laih chhiat hnuah Sangau SDO Vanlaltanpuia, BDO mawhphurhna latu ni bawk chuan mipui an buai lutuk loh nan Sangau-Siaha kawng hlui, Nohranga ram sira kal chu hlawhfa ruaiin a thawm ṭhattir a; chu kawng hlui chu ni nga vel an hman hnuah, a chhukchhoh lutuk vang leh ruahsurin a tihnâl avangin nimin aṭang khan lirtheite an kal thei lo niin an sawi.