Aizawl khawpuia free wifi dah turin AMC-in tender a chhuah nawn mek
Aizawl Municipal Corporation (AMC) chuan Aizawl khawpui lûn laia a thlawna hman theih wifi (free wifi) dah turin hma a la mek zel a; free wifi bun tur thlanna atan tender an chhuah hnuah, chhangtu pakhat chiah an awm avangin tender an chhuah nawn leh mek.
AMC hian free wifi buntu tur service provider thlanna atan August 16, 2016-ah tender an lo chhuah tawh a, chhanna thehluh hun September 5, 2016 thleng an hawng a; company pakhat chiahin an chháng a ni.
Vanglaini palai zawhna chhangin AMC mayor PC Lal-hming-thanga chuan, sorkar danah tender chhangtu pakhat chiah an awm chuan thlan theih a ni lo tih a sawi a, "Tender chhuah nawn leh ngei ngei a ngai a, chuvang chuan kan re-tender leh ta a ni," a ti.
PC Lalhmingthanga chuan, tender an chhuah nawn leh chu chhangtu pakhat aia tam an awm ngei an beisei thu sawiin, "Kumin chhungin tih ngei kan tum a, tihhlawhtlin theih ngei kan beisei," a ti a; tender chhuah nawn ngai lo se chuan free wifi chu an dah ṭep tawh tur thu a sawi.
Zawhna chhangin Aizawl Mayor chuan, free wifi chu a dahna hmun turte thlang tawh mah se, tihfel a la ni lo a, a man zat tur azirin dah zat tur a hriat theih dawn tih a sawi a; free wifi atan hian sum an dah sa tih a sawi bawk.
AMC-in Aizawla free wifi bun tura IT service provider thlanna atana tender a chhuah leh mekah hian, November 10, 2016 chhun dar 12 thleng thehluh hun hawn a ni a; service provider an thlan chu November 15-ah puanzar tum a ni.
Free wifi dah/bun chu December 31, 2016 ral hmaa zawh fel ngei tura tih a ni a; chumi chhunga a bun tura thlan service provider-in a tihfel hman loh chuan, contract tihtawp theih a ni ang.
AMC-in Aizawl khawpui lûn laia free wifi dah a tum chhan (objective) a tarlanah chuan, sorkar ṭha zawk a awm theih nan te, mipuite nena awlsam leh ṭha zawka internet hmanga inpawhna a awm theih nan te, mobile governance tih nan te, licence leh permit dilnate online hmanga awlsam zawka tih a nih theih nan te, online hmanga chhiah pek a nih theih nan te, inrálrinna awlsam zawka inpek nan tihte a tel.