ZORO, MNF leh BJP-in police kut thlak an dem

Zo Re-unification Organisation (ZORO) ṭhalai, MNF party leh BJP Mizoram Pradesh chuan nimin khan thuchhuah siamin, Mamit district chhung, New Kawnpui khuaa 5th IR police duty pahnihte April 18, 2020-a kut thlâktu Chakma-te an dem thu an tarlang a, police hliamte chu an ṭhat chhuah leh thuai theih nan duhsakna an hlân.

ZORO ṭhalai chuan, Mizo police pahnih kut thlaktu Chakma-te an dem thu tarlangin, "Takam misualte'n râwng taka sawisain, dimna tel miah loa kut an thlak hi hriatthiam har kan ti tak zet. Kan unau pawisawi lo kut thlaktute hi an phu tâwk hremna pek an nih theih nan sorkarin thâ thlah lo a, misualte hi man an nih hma chu zawng ngawrh sauh sauh turin kan phût a ni," an ti.

Pawi khawihtute chu hrem lohin an chhuak ang tih an hlauh thu sawiin ZORO ṭhalai chuan, "Kan ram chhungah ngei mikhual chám rei huangtauin a ram neitu zawk zahna leh dimna nei miah loa râwng taka kut an thlak ngam hi a zialo kan ti hle," an ti a; Chakma-te chu an nihna leh an chanvo hriattir turin ZORO ṭhalaite'n hma an lak dawn thu an sawi.

MNF chuan, pawi khawihtute man turin Mamit aṭangin SP, Additional SP, West Phaileng SDPO leh 5th IR hotute an kal nghal thu sawiin, "Tripura police-te'n nizan (Pathianni) dar 9 vel khan Chakma pathum an man nghal a, an vai hian Tripura chhung Kawnpui-I khuaa mite vek an ni. Kan police-te'n hma an la nghal hi lawmawm kan ti a, chinfel tur la awm pawh ṭha taka an hlen chhuah ngei kan beisei," an ti. Thil thleng hi politics-a hamṭhatna atana hman tum lo turin political party tin a ngen bawk.

BJP Mizoram Pradesh chuan, Chakma-te chêt dan chu an dem tak zet thu sawiin, "A titu an man tawh bakah hian mi dang inhnamhnawih nia hriatte a rang thei ang bera man chhuak turin thuneitute kan ngen. One man judicial magistrate inquiry din a, thil tisualtute chhui chhuah a, an phu tâwk hremna pek ni rawh se tih hi kan duh dan a ni," an ti. Mizoram BJP chuan, police pahnihte enkawlna senso zawng zawng tumsak tur leh zangnadawmna pe turin Mizoram sorkar an phût a ni.