KHAWTHLIR

AYUSH Hospital

Thenzawla Integrated AYUSH Hospital din thar chu vawiin hian chief minister Lal Thanhawla'n a hawng dawn. Damdawi-inah hian kumin August thla tîr aṭangin inentirna hawn a ni tawh a, chawlhkar liam ta thleng khan OPD-ah mi 4,556 an inentir tawh a ni. A hawnna inkhawmah hian Health Minister pawh a tel ang.

Zirlaite Ni

Vawiin, October 27 hi Zirlaite Ni a ni a, MZP chuan Lal Thanhawla Auditorium-ah an hmang dawn.

Lirnghing

Nimin chhun dar 11:59 khan Mizoramah rei lo tê lìr a nghîng a, thil tihchhiat a neih hriat a ni lo. US Geological Survey tarlan danin, nimina lirnghing hi Serchhip district hnuai km. 41 vela inṭan a ni a, magnitude 4.7-a náin a nghing a ni. Nimin vek, zing dar 7:51-ah pawh lirnghing ná lo têa hriat a ni a, hei hi chu Mawlaik, Sagain, Myanmar-a km. 110 vela thuka inṭan a ni thung.

Heroin man

Champhaia Excise & Narcotics department-te chuan October 25 khan Mualkawi dáiah heroin gram 55.4 leh a neitua puh - Lalchungnunga (21) s/o Nochungnunga, Haikhawl, Myanmar leh Lalkohthari (21) d/o Khualthanga, Haimual, Myanmar nia insawite an man. Nimin chawhnuah khan heroin gram 7.8 leh a neitua puh Lalrem­tluanga (20) s/o Tlanghluilova, Bethlehem Vengthlang nia inchhál an man bawk.

Tla hlum

JH Lallarthanga (53), Zokhawthar chu nimin zing khan an in chung aṭangin a tla a, damdawi-in panpui ni mah se, a hliam tuar loin zing dar 9:30-ah a thi.

Tihdikna

Nimin Vanglaini chhuaka police-in mi an man, ukil dinsaktu nei lote dinsaktu 'defence council' tia tarlan kha 'defence counsel' tih zawk tur a ni. Tihsual palhah ngaihdam kan dil e.