MZU-ah international seminar buatsaih

Mizoram University-a Department of English chuan nimin khan MZU Auditorium-ah ni thum awh tur, 'Claiming Differences: Literatures and Cultures' tih thupui hmangin international seminar an buatsaih a, chief minister Lal Thanhawla'n a hmanpui.

Chief Minister chuan, MZU-a department hrang hrangte'n national leh international seminar an huaihawt ṭhin chu zirtirtu leh zirlaite'n an hlâwkpui ngei a beisei thu sawiin, "Heng kaltlang hian zirlaite'n tawnhriat ṭha tak tak, nakina an tana la ṭangkai tur an nei thei a ni," a ti.

Seminar thupui, 'Claiming Differences: Literatures and Cultures' chungchang sawiin CM Hawla chuan, "Hnam thu leh hla leh hnam ziaráng chanchin hi thil ril leh thûk tak a ni a, kan hnam chanchin ṭheuh hi dik taka ziah a pawimawh," a ti a; British leh awp bettu dangte'n an duh dana Mizote chanchin an ziahte chu ennawn ṭul a tih thu a sawi.

Chief Minister chuan, India ram chu hnam hrang hrang,
ṭawng hrang hrang leh ziaráng inang lo tak takte chenhona ram a ni tih sawiin, "Heng kan inan lohnate hi inhrethiam tawn a, impumkhatna atan hman ṭangkai leh zâi khata insuihkhawm theih hi a pawimawh a ni," a ti.

Hmarchhak chanchin sawiin Lal Thanhawla chuan, "Min awpbettu British-te khan hmarchhaka hnam hrang hrangte chanchin an ziahnaah hnam râwng leh mâwl tê angin an ziak fo a, tunah chuan ṭhangthar tam takin an hnam chanchin an ziak ṭan tawh," a ti a; ṭhangtharte thuziak hmangin khawvel hmun danga chengte min hmuh dan chu a ṭha lamin a inthlak mek niin a sawi.

Seminar hi Indian Council for Social Sciences Research (ICSSR), New Delhi puihnaa buatsaih a ni a, October 28 thleng a awh dawn a ni.