Kawng siam ṭhat vat a ni dawn - Deputy Speaker

Assembly deputy speaker R Lalrinawma chuan nimin khan a bial chhunga Tuirial panna kawng chhe laite a enfiah a; kawng chhe laite chu a rang thei ang bera siam ṭhat a nih tur thu a sawi.

R Lalrinawma chuan, kuminah ruahtui a tlak tam vang leh a tlak rei avangin kawng chhiat nasat phah tih a sawi a, "Ruahtui bakah hian mimal tui lakna aṭanga tui luang leh kawng sira tuihâwk luankawr inhnawh ping ṭhinin kawngpuiah tui tam tak a luantir avangin kawngpui a tlo lo ṭhin a ni," a ti.

R Lalrinawma sawi danin, kuminah fûr ruahtui a tlak rei bakah, sorkar laipui aṭanga kawng thawm ṭhatna tura kum thum dana Mizoram sorkarin sum a dawn ṭhin chu kuminah a dawng har a, chungte avang chuan sorkarin kawng chhe lai thawm ṭhat hna a thawk thei mai lo a ni.

Kawng chhia siam ṭhatna tur sum sorkar laipui aṭangin dawn a ni tawh tih sawiin R Lalrinawma chuan, "Tender chhuah a ni tawh a, kawngpui chhe lai chu a rang thei ang bera siamṭhat a ni," a ti a; kawng ṭha loh vanga harsatna thlengah Zoram mipuite hriatthiamna a ngen.