Doctor dah tura hmalak an rêl

Sangau tlangdung leh Phawngpui tláng chhehvela khaw 30 aṭanga kal khawm, Phawngpui Area Coordination Committee (PACC)-te chuan, tun hnaia Bualpui NG leh South Vanlaiphai damdawi-ina doctor-te an aiawh tur dah loa sawn chhuah an nih avangin doctor dah a nih theih nan hmalakho an rêl.

PACC-te hi October 25, 2016 khan Sangau-ah an ṭhukhawm a, an chairman LS Lalhmingthanga, YLA sub-hqrs. Sangau president-in a kaihruai. Bualpui NG leh South Vanlaiphai damdawi-in (PHC)-ah doctor dah a nih theih nana hmalak an rêl bakah, an huam chhunga YMA, YLA leh V/C-te hnenah an ram chhung ṭheuha nungcha, thing leh mau humhalhna kawnga ṭan la tura ngen an rél a ni.

Darzokai lei (suspension bridge) siam zawh tawh tun thlenga mipuite hman theih tura hawn a nih loh chungchangah hmalak an rêl a; Lungtian khaw panna kawng siam mek chu chak zawka thawh a nih theihna tura hmalak leh, Sangau leh Cheural inkar kawng chu mimal zangnadawmna fel lo vanga dan a nih chungchangah hmalak an tum bawk.