VDP-te nena thawhho dan tur sawiho a ni

Champhai Police-te chuan Thawhlehni khan an conference hall-ah Champhai district chhunga VDP-te meeting an neihpui a, ṭha taka thawhho dan tur an sawipui.

Meeting-ah hian Champhai SP mawhphurhna la mektu, additional SP VL Lura Hauzel chuan, Police, Excise leh YMA-te'n ruihhlo do beihpui thlak turin thuthlukna an siam tawh tih a sawi a, "Sorkarin tih tak zetin sual a do dawn. VDP-te nen thawhhona ṭha tak an nei a nih chuan kan ram sualna hi a ziaawm ngei ka beisei. Sual kan dona kawnga dan ang taka kan chêt ṭhin loh avangin Court-ah thiam loh kan chang fo a, dan hmaa thiam kan chan theihna turin dan hnuaiah chet kan lak a ngai," a ti.

Champhaia judicial magistrate Thomas Lalrammawia chuan, VDP-te chu police thachhang dâwltu pawimawh tak an nih thu sawiin, "Champhai bikah police-te an indaih lo em em a, sual dona kawnga police kuta kan nghah ringawt chuan kan him tawk zo lo mai thei. VDP-te hi sual do kawngah kan pawimawh em em a ni," a ti. Sawiselna tam tak karah theihtawp chhuaha hna thawh a nih chuan a rah sengtu tur chu nunaute leh ram a ni tih hriat a, theihtawp chhuah a pawimawh thu a sawi.