Niminah ZMC-ah mi 16 endik

Zoram Medical College (ZMC) Covid-19 Testing Laboratory-ah nimin khan mi 16-te swab sample endik a ni a, he thu ziah lai thleng hian result hriat a la ni lo. Sample test-te zinga mi 13 chu Aizawl district-a mite an ni a, pathum chu Siaha district-a mite an ni.

Covid-19 kai rinhlelh thila ZMC/State Referral Hospital-a awm mek damlo pakhat chuan hripui a kai lo tih finfiah a ni tawh a, heti hian ZMC aṭanga rinhlelh endik tawh zawng zawng mi 27 zingah natna kai an la awm lo. ZMC Bulletin chuan Covid-19 vei ICU-a enkawl mek chu a dinhmun a ṭha hret hret tih a tarlang.

Mizorama dedicated Covid-19 hospital - ZMC/SRH chu nimin khan World Health Organisation leh UNICEF aiawhte'n an endik a ni.

Hetih lai hian, Mumbai Mizoram House-a awm mi palite'n Covid-19 an kai tih hmuh a nih hnuah mi dangte pawh Mizoram sorkar hmalaknain endik zui an ni a, hripui kai hmuh chhuah belh an awm lo tih thu dawn a ni.