Ek Ped Maa Ke Naam hnuaiah Mizoramah thing ṭiak phun a ni

Nimin khan Mizoram hmun hrang hrangah ‘Ek ped maa ke naam’ (Nu hmingin thing phun pakhat) tih thupui hmangin ‘Women for Trees’ campaign ṭan a ni a; Aizawlah chuan UDPA minister K Sapdanga'n BSUP Complex, Lawipu-ah a hawng. ‘Ek ped maa ke naam’ pual hian Samagra Shiksha bultumin district hrang hrangah thing phun a ni bawk.

UDPA director Jacob Lalawmpuia kaihhruaia Women for Trees campaign hawnna inkhawmah hian joint director Andrew Lalhruaia'n sorkar laipuiin campaign a duan dan leh department hmalakna leh hmachhawpte a sawi a; khualzahawm Lalmalsawma Pachuau, UDPA secretary-in SHG member-te hnenah thing phunna tura mamawhte a sem. Campaign hawn zawhah BSUP complex-ah thing eng emaw zat phun a ni.

K Sapdanga chuan, thing phun a ṭul rualin, thing phun sa enkawla châwm nun a pawimawh thu sawiin, sorkar laipuiin thing phun tam kawnga hma hruai tura a ruat hmeichhe self-help group (SHG)-te chu thing phun hna thawk tura an chak tawk thu a sawi.

Women for Trees hi Ministry of Housing and Urban Affairs (MoHUA)-in AMRUT Mitra (AMRUT leh DAY NULM tangkawp) hnuaiah World Environment Day puala hman tura duan a ni a, August 2025 thleng a awh dawn.

UDPA Minister chuan, "Khawvel boruak chhiain a ken tel, khuarel chhiatna tam tak lakah thing phun hmangin kan inveng thei a ni," a ti a; SHG-te chu ram pum pui eizawnna bul ṭanna atan an pawimawh thu sawiin, "Hlawhtlinna atan hausak aiin ngêlngheh a pawimawh zawk," a ti.

UDPA department ruahman dan chuan, SHG 112 aṭangin member 517-te'n thing ṭiak 1,149 an phun dawn a; Phase-I hnuaiah Mizorama khawpui 10-a hmun 46-ah thing phun tum a ni.

Samagra Shiksha bul tumin district hrang hranga district project office-te chuan nimina World Environment Day-ah ‘Ek Ped Maa Ke Naam 2.0' an hmang a; sikul naupangte nen hman niin, thing eng emaw zat phun a ni.

Samagra Shiksha aṭanga thu dawn danin, Ek Ped Maa Ke Naam 2.0 hi June 6 - September 30, 2025 chhung India ram pumah kalpui a ni dawn a, Forest department nen ṭangrualin sikul tinte'n thing ṭiak 70 ṭheuh phun tur niin, India ram pumah thing ṭiak nuai 1,000 phun tum a ni.

Ek Ped Maa Ke Naam 2.0 hian mihring nun enkawlna kawnga nute chawimawina leh hriselna kawnga an thawh hlâwkzia a entir a; thingkung chu nute ang bawka nunna chhawmdawltu, thlah kal zel tur tana eizawnna, humhimna leh dam khawchhuahna petu a nihziate entirna a ni.