KHAWTHLIR

Thing ṭiak phun

Institute of Bioresources and Sustainable Development (IBSD)-a thawkte chuan World Environment Day pualin nimin khan Lawipua Urban Public Health Centre (UPHC) compound-ah thing ṭiak eng emaw zat an phun.

MIMA-in ngen

Mizoram Merchant Association hruaitute chuan nimin khan Mizoram Cooperative Apex Bank Ltd. chairman Lalnunsanga leh hotu dangte an kâwm a; MCAB aṭanga loan latute hnena aṭanga AMC trade license leh GST pekna hnuhnung ber document pe tura an phûtna titawp turin an ngen. Loan lak tumte aṭangin kum 2 dam ILP phût turin an ngen bawk.

Khuh damdawi man

Lunglei police-te chuan nimin khan Lalrinthangi (53) w/o Lawmzuala, Electric Veng hnen aṭangin khuh damdawi, Shivcof-TS ml. 100 bûr eng emaw zat an man a, Rs 19,650 man a ni.

Zirlai lawmpui

MZP Headquarters, Hnahthial chuan nimin khan Horeb Lodge, Hnahthialah kumin HSLC leh HSSLC-a hlawhtlingte lawmpuina hun an buatsaih a, bialtu MLA Jeje Lalpekhlua'n a hmanpui. Hnahthial district-a HSLC leh HSSLC-a ti ṭha zirlaite bakah, 100% pass percentage nei sikulte hnenah lawmpuina hlan a ni. Jeje Lalpekhlua chuan, zirlaite chu taima tura chahin, "Taimakna tel lo chuan hlawhtlinna tak tak a neih theih loh a, thil tihna engkimah mi dangte aia nasaa thawh rim a ṭul ṭhin," a ti a; zu leh ruihhlo lakah fihlim turin a chah bawk.

Kolasib dist-ah TB vei mi 56 hmu

Nimin khan Kolasib DC conference hall-ah bawrhsap Robert C Lalhmangaiha kaihhruaiin District Task Force on Immunization leh TB Forum an ṭhu khawm a, hmalaknate leh hmachhawpte sawiho a ni. January-March 2025 chhungin Kolasib district-ah mi 526 khâk (spotum) endik aṭangin ngawr (TB) vei mi 56 hmuh chhuah a ni a, chu'ng zinga mi pali chu Multi Drug Resistance (MDR)-TB an ni.