Zawlpui zaua chhiatna thleng hi NHIDCL kawng siam nghawng a ni - Agri Minister

Agriculture & Farmers Welfare minister PC Vanlalruata chuan June 4, Nilaini khan ruahsur nasa vanga Serchhip Zawlpui Zau leileta chhiatna thlengte a enfiah. Zawlpui zaua chhiatna thleng chu NHIDCL kawng siamin a nghawng a nih thu leh, ngai an awh leh theih nan sorkarin theihtawp a chhuah dawn thu a sawi.

PC Vanlalruata chuan, ruahsur nasa vanga loneitute tawrhna chu a tawrhpui thu sawiin, "Sorkar chuan theihtawp chhuahin hma a laksak dawn che u. Zawlpui leilet mai bakah Serchhip khawpui chhunga chhiatna thlen nasatzia a takin ka hmu a, Mizoramah pawh a tuar nasa ber in ni a, ngai in awh leh theih nan sorkarin theihtawp a chhuah dawn a ni," a ti.

Zawlpui zaua chhiatna thleng chu NHIDCL kawng siamin a nghawng a nih thu sawiin Vanlalruata chuan, "Serchhipa tun hmaa la thleng ngai lo, Zawlpui leilet hmunhma heti taka tuilianin a tichhe ta hi pawi tak zet a, hmasawnna ruhrel din a nih rual hian environment ngaih pawimawh tel a ṭul hle a ni," a ti a, chhiatna thleng chuan fimkhur a ṭulzia a tihchian thu a sawi.

Agriculture Minister hnenah leilet neitute'n an harsatna leh mamawhte an lo thlen a; tui an lakna lui te luanna hmun insawn leh zau panna lei (bridge) chhia chungchang lo thlenin, siamṭhat a nih theih nan hmalaksak thuai turin an ngen.

Sorkar thuchhuah tarlan danin, Zawlpui zauah hian tun hnai ruahsur nasain leilet tam tak tichhiain, tui lakna a tichhe nasa hle a; Zawlpui panna kawng pawimawh Tuichar lei a bun bakah, Tuichar lui luanna a insawn a ni.