State pali din champha lawm a ni

Ek Bharat Shreshtha Bharat hmalakna hnuaiah nimin khan Governor Gen. Dr Vijay Kumar Singh chuan Raj Bhaban-ah Sikkim, Goa, Telengana leh West Bengal-te state puitlinga hlan kai ni, Foundation Day lawmna a buatsaih.

Foundation Day lawmnaah hian state palite chanchin tawi ngaihthlak a ni a, RIPANS, Mizoram University leh Aizawl North College zirlaite'n hnam hrang hrang lâm an entir a ni.

Larsap chuan, India rama state leh union territory-te din champha lawmna chu Prime Minister hmalakna 'Ek Bharat Shreshtha Bharat' hnuaia kalpui a nih thu leh Raj Bhavan leh Raj Niwas tinah hman ṭhin a nih thu a sawi a, "State leh UT hrang hrangte chanchin leh hnam ziarângte pho lan ṭhin a ni a, hnam ziarâng leh nunphung danglam tak tak kara inlungrualna leh inunauna ṭha a awm theih nan buatsaih a ni," a ti.

West Bengal hi India-in zalenna a hmuh hnu lawk June 20, 1947-ah state a ni a, Sikkim hi May 16, 1975 khan state puitlinga hlankai a ni. Goa chu May 30, 1987-ah state puitlinga hlankai a ni a; Telengana chu India rama state naupang ber niin, June 2, 2014 khan Andhra Pradesh aṭangin state-ah hlankai a ni.