Minister-in a biala sikul 16 a tlawh; Ruihhlo ṭhat lohna zirtir tam turin a chah

Minister Lalrinpuii chuan June 4, Nilaini leh nimin khan a bial, Lunglei East huam chhunga Lunglei Chanmari, Electric Veng leh Ramthar Vengah sikul 16 leh anganwadi centre pahnih a tlawh a; zirlaite zirlaite'n ruihhlo an tih chhin loh nan a tam thei ang ber zirtir turin zirtirtute a chah.

Lalrinpuii hian June 4 khan Lunglei Chanmari leh Electric Venga sikul 12 leh anganwadi pakhat a tlawh a, nimin khan Chanmari leh Ramthar Venga sikul pali leh anganwadi centre pakhat a tlawh leh a; thawktute nen inkâwmin, an harsatnate a sawipui a ni.

Lalrinpuii chuan, ruihhloin Mizoram a tihchhia a, a veiawm tak zet tih sawiin, "MSDRB-in zirchianna a neihnaah middle school kal lai aṭanga drugs khawih ching an awm tawh nia hriat a ni. Zirtirtute'n kan zirlaite hnenah ruihhlo ti chhin lo tura a tam thei ang bera kan fuih a ṭul tawh," a ti.

Minister hian a bial chhunga sikul hrang hranga zirtirtute'n mamawh an thlente chu MLA fund aṭangin a theih ang ang tihsak a tum thu a sawi bawk.

Lalrinpuii hian nimin vêk khan Christian Hospital a tlawh a, Mizoram Universal Healthcare Scheme an hman dan enpuiin, MUHCS chu ṭha taka kalpui zel turin a ngen a ni.

Minister hi Lunglei East huam chhunga LMC councillor pali - K Lalrin-awma, Malsawmkimi, R Lalremsiama leh Vanlalliana Pachuau ten an ṭawiawm.