HATIM-in Valedictory Ceremony hmang

Higher and Technical Institute Mizoram (HATIM) chuan nimin khan Lunglei Pukpuia an hmunah Valedictory Ceremony vawi 16-na an hmang a, minister Lalrinpuii'n a hmanpui.

HATIM Valedictory Ceremony-ah hian zirlai ṭhate hnenah chawimawina hlan a ni a; zirlai ṭha ber lawmman, HATIM Award 2025 chu Lalngaihsaki Hauhulh, Department of English hnenah hlan a ni. Department pariata zirlai ti ṭha ber (topper)-te hnenah proficiency award hlan a ni bawk.

Minister Lalrinpuii chuan, college aṭanga chhuak mai turte chu rinawmna leh mi dang hriatthiamna nunpui tlat tur te, thil chîk tur te, inzir belh zel tur te, an tui zawng tak tih leh thawh tum tur te, mahni inrintâwkna leh huaisenna nena nun hmachhawn zel turtein a chah. Mizoram chu ruihhlo leh HIV/AIDS-in a rûn mek tih sawiin, ruihhlo leh mipat hmeichhiatna kawnga inthiar fihlim turin a chah a, a donaah theihtawp chhuah turin a sáwm a ni.

HATIM Valedictory Ceremony hi Lunglei South bialtu MLA Lalramliana Papuia, Lunglei Municipal Council chairman Lalzuithanga leh councillor-te pawhin an hmanpui.

HATIM hi BCM-in June 21, 2007-ah a din a, BA, B.Com, BCA leh Bachelor of Social Work (BSW) zir theihna a ni a; kumina zirlai chhuak tur an thlah tâkte chu mi 82 an ni.