Police constable atan 259 lak an ni; "Langtlang leh felfai taka lak a ni" - Mizoram Police

Mizoram Police constable tur lakna chu zawh a ni ta a, police atana tling mi 259-te chu an hriselna dinhmun enfiah leh a ni ang. Mizoram Police chuan thuchhuah siamin, police constable (armed, unarmed leh mechanic) lakna chu langtlang leh felfai taka tih a nih thu an tarlang.

Police constable recruitment atana dilna thehluttute chu March 10, 2025 aṭanga May 26, 2025 chhung physical efficiency test (PET) & physical standard test (PST) hmun pali-ah neihpui an ni tih tarlangin Mizoram Police chuan, "Diltu zawng zawng mi 15,311 aṭangin mi 10,899 an inlan a, mi 8,037-te'n PET & PST an paltlang. Constable (mechanic) diltute tan mechanic demonstration/practical test June 9-16, 2025 chhung buatsaih niin, mi 23 an inlan a, mi 18-te'n practical test an paltlang," an ti.

Police tarlan danin, constable (armed branch leh unarmed branch) diltute tan written examination chu May 3, 2025 Aizawl, Lunglei leh Khawzawla exam centre hrang hrangah buatsaih a ni a, diltu mi 7,475 inlanin, personal interview hmachhawn turin mi 442 an tling.

May 23 aṭanga June 4 chhungin personal interview buatsaih a ni a, candidate mi 630 (unreserved (UB & AB), women, ex-servicemen, MRHG 442, mechanic 18, sportsperson 170) ten interview an hmachhawn a, interview aṭangin mi 259 an tling ta a ni.

Recruitment felfai, langtlang leh dik neih a nih theih nan Mizoram sorkarin hetiang lama rintlak leh tawnhriat nei ṭha tawh Infoclab Solutions Private Ltd, Delhi chu rawih an nih thu Police thuchhuah chuan a tarlang.

Infoclab Solutions hian Radio Frequency Identification (RFID) leh Biometric Identification Technology hmangin physical efficiency test, physical standard test, written examination leh interview thlengin an endik a ni.

Written exam endik turin mithiam rawih niin, optical mark recognition (OMR) hmanga tih a ni tih sawiin Police thuchhuah chuan, "Langtlang leh felfai takin recruitment hi kalpui a ni a, pawn lam inrawlhna pakhat mah awm loin, a ti ṭha apiang (merit ang chiahin) tlinga puan an ni," a ti a; tlinga puan tâkte chuan medical test leh police verification an paltlang a la ngaih dawn thu an tarlang bawk.